Ramri hrulah ruihhlo do aupui

Ramri hrulah ruihhlo do aupui
District Level Nasha Mukt Bharat Abhiyaan Committee Siaha thukhawmin a rel angin Siaha district chhung Myanmar ramri hrula khaw awmte hnenah ruihhlo that lohzia zirtir an ni.
District Level NMBA Committee member secretary, district social welfare officer LS Lalbiakzuali hoa fehchhuakin February 6 & 7 khan ramri hrul khaw pali – Lobo, Chhaolô, Iana leh Siata-ah drugs free India campaign an nei a, district chhung ramri hrul khua tlawh chhunzawm zel an la tum a ni.
Mipui kalkhawmte hnenah ruihhlo that loh zia, ruihhlo tihchhin pawi zia leh ram leh hnam tibuaitu, chhungkaw tam tak tikehchhetu leh mipui tiralmuang lotu a nih thu an sawi a. Ruihhloin a la tihbuai loh thalai duhawm tak takte venhim leh tichhin miah lo tura zirtir chu nu leh pa leh rilru fim pu puitling zawkte mawhphurhna a ni tih hre thar leh turin an chah.
Ruihhlo do chu sawrkar department leh tlawmngai pawl kutah chauh dah theih a ni tawh lo tih lanna chu, chhungkaw tin leh khaw tin harsatna tawh a ni tawh tih sawi a ni a. Ram leh hnam hmelma a nih avangin hmelma chu mahni ngeiin do a ngai, tiin, ruihhlo lakah hnehna changa ram nuam leh ralmuang tak din tura theihtawp chhuah turin mipui an fuih a ni.
District Level NMBA member fehchhuakte hi Tipa leh Siaha RD Block BDO-in ruahmanna an siam angin khawtlang hruaituten lo dawngsawngin, mipui kohkhawmna tur hmunhma an lo ruahmansak a ni.