Sawrkarin police la leh dawn AR ram kalsan cheitha dawn: – Home minister
Mizoram sawrkarin police 200 a la leh dawn a, a hmaa lak anga dik taka lak a ni dawn tih Home minister K Sapdanga chuan a sawi. Assam Rifles ram chhuahsan tak chu a zau thei ang hmun hringa siamin, a zau thei ang kawngpuia siam tum a ni tih a sawi bawk.Thawhtannia ZPM office-a inkhawmah Home minister chuan, kum 2021 atanga chhiarin kum tin police boral za chuang an awm thin a, kumtin mi 150 vel pension an awm ziah bawk a. Post ruak 4666 a awm mek a, tunah training lai 250 an awm a, sawrkar kumtharah police 200 lak leh tum a ni tih a sawi.
“A hmaa police kan lak dan ang khan dik takin kan la leh dawn. Kum 2025 kha police-ten fitness uar kumah kan hmang a, kum 2026 hi discipline uar kumah kan puang ve leh thung. Police-ah chuan posting duhna hmun dil a awm ve loa, a hun takah leh a hmun dik takah engkim tih vek tum a ni,” a ti.
ZPM sawrkarin kuhva smuggling a do a, eptuten an ni an do ve thung tih a sawi. Politician inrawlhte mipuiin an hnawl a, police inrawlh pawh an pension zel a. Kum hnih chhungin Hachhek bialin a rah an tel a, sawrkarin kuhva smuggling a khap zel dawn a, service lai an ni emaw civil mi an ni emaw, inhnamhnawih chu an dim dawn lo tih a sawi.
Aizawla Assam Rifles ram chhuahsan takah vantlang tana tangkaia siam a ni dawn tih K Sapdanga hian a sawi a. A zau thei ang ber hmun hringa siam an tum a, a zau thei ang ber kawngpui siam an tum a, tualchaina ber Lammual pawh phul thar tha chi phah tum a ni tih a sawi.
A ngil thei ang berin lamlian, metre 14-a zau sial tum niin, Dak Inpui atanga Saron Veng panna kawng metre 7-a a zau laih tum a ni tih a sawi.
“Lirthei sang chuang dah theihna tur parking lot lian leh mi 4000 chuang lenna tur Convention Centre ruahman mek a ni a. Bazar Bungkawnah Aizawl Square (Island) siam tum a ni a, Assam Rifles Mandir pawh zau zawka la hekin kawng sial a ni anga, a chungah public park siam tum a ni. Heng hmasawnna ruhrel din kan tumah hian sawrkar thlawp tur leh thawhpui thei tur AMC kan mamawh a ni,” a ti.
Thenzawl Peace City DPR siam mek niin, chak taka hna kalpui tum a ni tih UD&PA minister ni bawk K Sapdanga hian a sawi a. Aizawl khawpui sawn tumna ni loin, Aizawl khawpui tawt lutuk tih ziaawmna tura ruahman a ni tih a sawi a; a thawh khatna atan mi nuai khat chen theihna turin ruahman chhin phawt a ni tih a sawi.