Sawhthing rate thar siam Hmarchate rate siam bawk

Mizoram Agricultural Marketing Board chuan sawrkar kaltlanga sawhthing lei theih dan tur rate thar a siam a. Mizo hmarchate rate a siam thar bawk.
Sawrkar din Mizoram Agricultural Marketing Board (MAMB) hian Siligury-a sawhthing lei leh hralhna hmunpuia an rate milin, sawrkar kaltlanga an leina rate atan February 2-7 chhung khan a hniam berah kg ah Rs.40, a sang lamah Rs.45 a bituk a, sawhthing lei thin sumdawngten an lei lo.
Tun kar thara sawhthing rate atan kg ah Rs.30 atanga 35 inkar a bituk thar a, MAMB chuan Secondary Collection Centre tinah sawhthing leina man hniam ber – floor price tur hi India ram wholesale market hrang hranga an rate en chungin kartin emaw a tul angin a bituk thin dawn tih a sawi a ni.
Hetihlai hian MAMB chuan Mizo hmarchate ro chu MAMCO kaltlangin sawrkarin February atanga April chhung hian lei a tum tih a sawi a. Sawrkar reserve price, kg. ah Rs. 350 emaw a aia sang emawa hralhna hrelo an awm a nih chuan MAMCO managing director hnena in report turin an hriattir.
Sawrkar rate siam ang chuan, hmarchate ro hi kg. ah Rs. 350, hmarchate ro (organic) kg ah. Rs. 550, hmarchate ro (pesticide residue free, organic conversion stage) kg. ah Rs. 450 a ni ang.