Manipur-ah tribal hnam hnih intibuai thar

Manipur-a Ukhrul district-ah Pathianni zan khan tribal pawl hnih chu lungin an intawng chiam a, hei vang hian thuneituten inkhuahkhirhna an kalpui tih an sawi.
Venhim hna thawktuten Litan khuaa buaina chhuakah hian mi hnawh darh nan tear gas shell-in an vawm tih an sawi a. Silai pawh a puak nia sawi a ni.
Ukhrul district magistrate chuan Litan-ah hian Tangkhul leh Kuki an intibuai a, muanna leh mipui khawsak an tibuai nasa niin a sawi a. Hei vang hian vantlang thil leh mihring nunna tana hlauhawm thei a awm avangin khuahkhirhna kalpui a ni tih a sawi.
District Magistrate Asish Das-a chuan BNSS, 2023 Section 163 Sub-Section 1 angin Pathianni zan dar -7:00 atanga thu dang puan a nih leh hma chu mi tumah pawn chhuak lo turin a ti a, mahni chenna hung pawn lam tumahin dai lo turin a ti a ni.
Thuneitute chuan Litan-a hnam hnih inkara buaina hi a hma zan atanga intan tawh kha niin an sawi a, Tangkhul mi pakhat chu mi pasarih/pariat velin Inrinni zan khan an sawisa a, heta tanga intan hi a ni tih an sawi.
Kut tuartu chhungte leh Litan lal, Sareikhong chuan an sawiho hnuah hnam hnihte hian hnam dan anga inremna siampui an tum a, Pathianni khan an inbiak hun atana an ruahman a ni a. Inbiakna hmunah hian a tuartu lam chhungte an lang ta lo thung.
An chenna, Sikibung khuaa mite thawk chhuak zawkin Litan lal, Sareikhong-a chenna chu an bei ta zawk a. An kal darh hnuah a khaw miten an haw lam chu silaiin vawi sarih vel an kap zui a, buaina a chhuak thar leh a ni.