Aizawlah Half Marathon nei dawn
Aizawlah Half Marathon nei dawn
February 14 hian Aizawl International Half Marathon neih a ni dawn a. Tualchhung bakah India ram state dang leh ram pawn atangin tel tum an awm nual.
Aizawl International Half Marathon (AIHM) hi kum 2025 khan neih a lo ni tawh a, hemi tuma an tlan dan angin, Rajiv Gandhi Stadium Mualpui Salem Veng atangin Melthum – Silai Mual thleng an tlan anga, tlan let lehin Chite an thleng anga, heta tang hian Rajiv Gandhi Stadium ah an lut ang.
Half Marathon hi km. 21.1 a ni anga, mipa leh hmeichhia a hrangin then a ni. Mipa leh hmeichhia a hrang zelin Open Race – km.10, Fun Race – km.5, kum 10-15 inkar tan Junior category – km.5 leh kum 60 chin chunglam tan senior /veteran – km.5 siam a ni.
Tlan tur tan registration fee Rs. 799 a awm a. Rampawn atanga tel tur tan US dollar 30 a ni. Registration hi online-a tih theih hun khar a ni tawh a, February 12 leh 13 ah Lammual-ah ‘offline registration’ tih a ni ang. Junior leh senior category bik hi offline registration chauh a tih theih a, registration fee Rs. 499 a ni.
Sports & Youth Services minister Lalnghinglova Hmar chuan, marathon kan hriat thinah chuan ei leh in tur leh t-shirt te a thlawna dawn a nih laiin, tuna registration fee an tih chhan chu Athletics Federation of India tih dan zulzuia kalpui a nih vang a ni tih a sawi. Km. 21.1 tlan duh, registration fee pek tura harsatna nei chu ama hnenah emaw a office ah emaw kalin an lo pui dawn tih a sawi a ni.
Mizoram Athletics Association president Lalduhkima Sailo chuan nikum khan mi 1500 vel an tel a, kuminah a let an tel beisei a ni tih a sawi. NCC, Traffic Police leh Health department bakah a kaihhnawih department leh association te nen an thawkho tha hle tih a sawi a ni.
AIHM-a Mizoram sawrkarin a thawhpui Innovations India managing director captain Rahul Bali chuan ram dang runner – England, France, Ethiopia, Kenya, Bahrain, Nepal atangin rawn tel an tum a. Mizoram lut tura ‘Protected Area Permit’ a ngaih avangin buaipui mek a ni tih a sawi. Nakumah chuan foreign runner hi category hrana tih tir an tum dawn tih a sawi a. State thenkhat – Haryana, Rajasthan, Kashmir, Madhya Pradesh atangin an rawn ngaihven tih a sawi.
AIHM-a tel te hak tur t-shirt chu Nilaini khan Home minsiter K Sapdanga’n a tlangzarh a ni.