ICFAI University-in ram tana tuartu Vanlalzari chawimawi

ICFAI University Mizoram chuan Mizoram buai laia ram leh hnam tana tuartu zing ami B Vanlalzari chu Nilaini khan an chawimawi.
He hun hmanpuitu MNF senior vice president Dr R Lalthangliana, MLA chuan, kum 1975-ah Capt. Lalhleia leh a thianten IGP leh police hotu dang an kahhlum boruak inmung nasat lai kal zelah khatih laia IGP office-ah hna thawk ve B Vanlalzari chu inhnamhnawiha an rinhlelh avangin dam chhunga lung in tang turin Tezpur Jail-ah dah a ni a; kum 6 vel a tan hnuah lak chhuah a ni tih a sawi.
Hetihlai hian a ni chu MSU Shillong president a ni a, Assam sawrkara Treasury officer Pu Kaia chuan daka lehkha rawn thawnin, Tezpur Jail-a Mizo nula B Vanlalzari dam chhung tang tura dah chu an hre lo nge tih a rawn zawh thu Dr R Lalthangliana hian a sawi a. Hma an la nghal char char a, sum neihsa an neih loh avangin donation an khawn chawp a, Supreme Court an thleng hial a, a tawpah MZP hruaitu Pu Zokailiana (L) nen an la chhuak thei ta tih a sawi a ni.
Chawimawina hlan B Vanlalzari chuan, ICFAI University-in a thil tawn ngaihlua hetiang hun tha an buatsaih chu lawmawm a tih thu sawiin, “ICFAI University-in Mizo hnam hmangaihtu vice chancellor kan nei hi lawmawm ka ti a, he zirna in sang atang hian Mizo hmangaihtu zirlaite lo chhuak zel ang che u. Hei lo hi ram dang kan nei loa, kan thiamna leh theihna hi kan Mizo hnam tan hlan zel turin zirlaite ka sawm a ni,” a ti.
Special invitee, MJA president C Lalrambuatsaiha pawhin, kan pate leh rual uten ram leh hnam tan luchhum ban chhum huamin an bei a, thangtharte chuan silai lek ve a ngai ta loa, ram leh hnam tan economy lama din chhuah tumin hma kan lak a ngai tih a sawi. Agriculture leh thildanga hma la chiam turin kan ram leilungin a zir tawk loh avangin, unskill chauh nilo skill lama thalaite tan kan lak a ngai a, Mizoram sawrkar hnuai chauh ni lo, ram dang leh state danga hna dang thawk turin kan tan a ngai tih a sawi a ni.