Mizo entrepreneur-te bana kaia dinchhuah tir kan duh – Chief minister

Mizo entrepreneur-te sawrkarin an bana kaia dinchhuah tir an duh tih chief minister Lalduhoma chuan a sawi
Confederation of Indian Industry Centre for Excellence on Employment & Livelihood (CII CEL) leh Mizoram sawrkar tangdun buatsaih Micro & Small Entrepreneurs Excellence Project-in Mizoram leh Mizoram Entrepreneurs Development Forum chu Ningani khan Aizawlah neih a ni. He hmalakna hi Mizorama MSME neitu, hmasawn zel tumte intuaihriamna atana tih a ni.
Hmanpuitu chief minister Lalduhoma chuan, Mizote chu thiamthil ngah hnam kan ni a, MSME lamah hmakhaw eng tak kan nei tih a sawi. Kan ramin dehchhuah a neih a, hnathawh tur a pun theihnan thalai skill nei tha tak takte chawikan an tum tih sawiin, “Entrepreneur-te hi an bana kaia dinchhuah tir kan duh a, kan flagship scheme Bana Kaih hian an tan remchang a siamsak mek a ni,” a ti.
Entrepreneur-te kawng kawhhmuh tur hian CII tluka tha India ramah an awm lo tih a sawi a. CII CEL hian state dangah pawh hetiang hmalakna hi an hlawkpui hle tih a sawi a ni.
Chief minister-in a hawn project pahnih hi Mizoram MSME neitu, an hnathawhna lama hmasawn zel duh, tunlai thiamna thar ber ber nena intuaihriam duh tana buatsaih a ni a. Mithiam zawkte nena an mamawh sawihona pawh siamsak an ni a, kum khat chhung kalpui phawt tur niin, mi 70 training tura thlan an ni.