Condom a nihna anga hman a hun “Kawppui laka rinawm lo kan tam” – Health minister

Condom chungchanga kan ngaihdan leh rinthu diklo kan neih thin paihbo a hun tih Health minister Lalrinpuii chuan a sawi a. Mizoramah mahni kawppui laka rinawm lo an tam chu pawi a tih thu a sawi.
February 13 kha International Condom Day a ni a, he ni denchhen hian Mizoram State AIDS Control Society leh AIDS Healthcare Foundation India Cares buatsaihin Aizawlah hun hman a ni. Kumin International Condom Day thupui atan “Just Use It” tih a ni.
Hmanpuitu Health & Family Welfare minister hian Mizoramah sex atanga HIV kai kan pung zel chu a ngaimawh awm tih a sawi a. World Health Organization-in condom chu HIV leh sex atanga inkaichhawn theih natna darh tur venna awlsam leh tangkai ber pakhat a ni, tiin, “Kan ramah pawh condom chungchanga kan ngaihdan leh rinthu diklo kan neih thin paihbo ila, a hman dan leh a nihna ang taka condom hi hman a nih chuan, HIV leh sex atanga inkai chhawn theih natna darh tur nasa taka kan ven theih ka beisei,” a ti.
India ram puma HIV darh dan rate chu 0.2 a nih laiin, Mizoram HIV a darh dan rate 2.74 a ni chu a zahthlak tih a sawi a. Mizoramah mahni kawppui laka rinawm lo an tam chu pawi a tih thu sawiin, “Kan rinna nen pawh a inhmeh lo. Hei hi HIV darh zel chhan lian tak pakhat a ni a, kawppui lakah rinawm turin Zoram mipui ka chah a. Thalaite, nupui pasal neih hmaa sex hmang lo tur leh a thei ngang lo chu condom hmang hreh lo turin ka chah a ni,” a ti.
HIV kaina tam ber chu sex atangin a ni a, zaa 70 a ni tih Health minister hian a sawi a. Sex atanga HIV a darh zel lohnan leh kan hrisel zel theihnan “Just use it” tih chu hrereng turin thalaite a chah.
International Condom Day hmannaah hian Love Brigade 2.0 Campaign hawn a ni a. Love Brigade 2.0 Campaign-ah hian two-wheeler taxi khalhtute hnenah condom pai theihna tur Love Brigade Condom Jacket sem a ni.