NHIDCL enkawl kawngpui siam ran phutin kawng zawh

NHIDCL enkawl kawngpui siam ran phutin kawng zawh
Kolasib Joint Action Committee on National Highways huaihawtin Thawhtanni khan kumin fur ruahtui tlak hma ngeia Mizoram ei leh bar lakluhna kawngpui siamthat a nih theihnan Kolasib-ah kawng zawh a ni.
JAC hruaitute chuan kawng zawh chhan an sawifiah a. Kolasib district chu kawng hrang hrangin hlamchhiah an ni a, kawngpui chungchangah pawh district thuneitute bakah kawngpui enkawltu NHIDCL leh an hnuaia contractor-te nen tum engemawzat an thukhawm tawh a, hei hian awmzia a nei loa, NHIDCL leh an hnuaia contractor-te chu an intiam angin an awm zui ngai loa, hmasawnna hmuh tur a awm lo tih an sawi.
NHIDCL general manager BK Srivastava chu Mizoram chhuahsan tura an duh thu an sawi a ni.
Kawngzawh hnu hian Joint Action Committee hruaitute hi NHIDCL hotute nen an inkawm a, an resolution thlir hoin, NHIDCL hnuaia highway contractor hrang hrangten an chin theuhah March 15 ralhmain Kolasib district-a kawngpui chu zaa 75 tal siam zo ngei turin inremna an ziak.
Hei bakah hian High Court thu dinglai angin Vairengte atanga Sairang kawngpui an siam that mek chu kumin April 30 ralhmaa zo hman turin an phut tih an sawi bawk.