J. Cole-a’n No.1 album pasarih a nei tling ta

On Feb 17, 2026 8 0

J. Cole-a’n No.1 album pasarih a nei tling ta
J. Cole album thar ‘The Fall-Off’ chu Billboard 200 (US albums) chart No.1-ah a debut a, he chart-a No.1 kai thei album pasarih a neihna a ni. Hetihrual hian Bad Bunny pawhin Super Bowl Halftime Show-a a performance zar zoin top 10-ah a album pahnih a rawn lang thar leh a, ATEEZ leh Joji te top 10-ah an debut bawk.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah stream atanga album hralhna tlukpui leh album-a hla a mala hralhna atanga album tlukpui te belhkhawm thin a ni.
J. Cole ‘The Fall-Off’ hi kar khat chhungin US-a 2,80,000 an hralh thei a, chung zinga 1,66,500 chu streaming atanga album tlukpui (on-demand official stream maktaduai 169.5) niin, album tak tak hralh chu 1,13,000 a ni a, album-a hla a mala hralhna atangin 500 a tling thei bawk.
J. Cole hian No.1 album pasarih a nei tling ta chiah a, The Off-Season (2021), KOD (2018), 4 Your Eyez Only (2016), 2014 Forest Hills Drive (2014), Born Sinner (2013) leh Cole World: The Sideline Story (2011) te No.1 a lo kaipui tawh bawk.
Bad Bunny album, No.1 pawh lo ni tawh ‘DeBI TiRAR MaS FOToS’ chu 2,50,000 hralh lehin No.2 a la ni a, he album hi kar khat chhung a hralh that ber tum a la ni. He album hi January 2025-a a tlangzarh kha niin, Grammy a a chet that zar zoin chart top 10-ah a rawn lang thar leh a, Super Bowl Halftime-ah a perform zui leh a, chu chuan a album hralh a rawn tikal lehzual ta a ni.
ATEEZ album thar ‘GOLDEN HOUR : Part.4” chu No.3-ah a debut a, 2,00,000 hralhin, chung zinga 1,95,000 chu album tak tak hralhna niin, streaming atangin 5,000 (on-demand official stream maktaduai 5.58) a ni a, hla mal hralhna chu chhiar tham a ni lo. ATEE hian he chart top 10-a lang thei album pariat an nei tling ta a ni.
Kar kalta No.1 Don Toliver ‘OCTANE’ chu 97,000 hralh lehin No.1 atangin No.4-ah a tawlh ve thung. ‘OCTANE’ hralhna hi a kar hnihnaah 40% vela a tlahniam a ni.
Joji album thar ‘Piss In the Wind’ chu 86,000 hralhin No.5-ah a debut a, 45,000 chu album tak tak hralhna niin, streaming atangin 41,000 (on-demand official stream maktaduai 42.17) a tling thei bawk. Joji hian top 10 album pali a nei tling ta a ni.
Bad Bunny album dang, chart No.1 hlui Un Verano Sin To chu 81,000 hralh lehin No.16 atangin No.6 a kai tar leh ta a, tihian tunkar chart top 10-ah album pahnih neiin, hetiang hi a tawn vawi khatna a ni.
Chart No.1 hlui Morgan Wallen “I’m the Problem’ chu 77,000 hralh lehin No.3 atangin No.7-ah a tawlh a, Olivia Dean ‘The Art of Loving’ chu 75,000 hralh lehin No.4 atangin No.8-ah a tawlh a, chart No.1 hlui Taylor Swift ‘The Life of a Showgirl’ chu 54,000 hralh lehin No.5 atangin No.9-a a tawlh a, chart No.1 hlui bawk KPop Demon Hunters soundtrack chu 42,000 hralh lehin No.6 atangin No.10-ah a tawlh ta bawk.