Jeff Bezos a thenawmah Mark Zuckerberg-a’n $150M man ram a lei

Jeff Bezos a thenawmah Mark Zuckerberg-a’n $150M man ram a lei
Facebook founder Mark Zuckerberg leh a nupui Dr Priscilla Chan te chuan mihausaho awm khawmna, Miami bula Indian Creek Island-ah ram zau tak leiin, hetah hian an chhungkua an insuan luh thuai an tum niin The Wall Street Journal chuan an tarlang a, Zuckerberg-te nupa hi Amazon founder Jeff Bezos-a nen inthenawm hnaitein an awm tawh dawn a ni. Indian Creek Island hi thliarkar siamchawp niin, ram 41 lei theihin a awm a, tunah chuan mi 84 vel an khawsa mek a, in man tlawm ber pawh dollar maktaduai 60 vel atangin a intan. Tunlaia America-a in hmun lo ram ngaihven hlawh ber te zinga mi a ni.
Indian Creek Island hian ama pualin municipality leh mahi puala sorkar nei, private police force te boruak, tui leh khawmuala an patrol rengna hmun niin, he thliarkar a luh theihna hi lei pakhat chiah a awm a, chuvangin a mi chengte himna leh privacy atan hmun duhawm tak a ni. A ram chhungah hian golf course awmin, Indian Creek Country Club a awm nghal a, club member awm thei zat tur bituk awmin, club member nih dil nan pawh dollar 5,00,000 initiation fee a ngai!
Zuckerberg-a ram lei hi thliarkar khawthlang lam niin, Bezos pawhin hmun pahnih a neihna lam a ni a. 80,000 square feet a zau niin, Biscayne Bay nen inhne deuh reng, ni tla tur thlir theihna hmun remchang tak a ni.
Zuckerberg-a thenawm ni tur, billionaire car dealer Norman Braman-a nupui Irma Braman chuan Zuckerberg te hi April thlaah insuan luh an tum tawh a ti niin Wall Street Journal chuan an tarlang. Miami Beac real estage agent Corcoran Group chuan Zuckerberg-a’n 2 Indian Creek Island Road-a ram a lei chu dollar maktaduai 150 atanga 200 man vel a nih thu an tarlang ve bawk.
Indian Creek Island hi milar leh mihausa lamin an bawh hle a, Bezos bakah financier Carl Icahn leh NFL quarterback ni thin Tom Brady te pawh an khawsa mek a ni.