Electric bill sang duh lohna lantir

Electric bill sang duh lohna lantir
Sawrkarin electric bill nasa takin a tisang tih sawiin Thawhlehni khan Congress Thalai huaihawtin bill sang duh lohna lantir a ni.
Vanapa Hall kawta ‘Electric bill sang uchuak avanga mipui thlavang hauhna’ lantirnaah Congress Thalai vice president Ngurdingpuia Pachuau chuan, ZPM party-in 2023 MLA inthlan dawnah an sawrkar chuan electric bill an ti sang ve dawn lo, tiin mipuiah an inzuar a. ZPM sawrkar hnu, 2023 December 11-ah Power & Electricity minister Pu F Rodingliana chuan department hotute hmaah kum 5 chhungin electric bill tihsan a nih loh tur thu a sawi a. Thenzawl Solar Power Plant hawnnaah chief minister Pu Lalduhoma pawhin electric bill an tihsan loh tur thu a sawi tih a sawi a ni.
Hetihlai hian nikum kum tawp lam atangin electric bill hi uchuak taka tih san a ni a, eng chhit leh bill chawi a inmil loa, ZPM sawrkar chu a intiam angin a awm loa, mipui harsatna sukiang turin an phut tih a sawi a ni.
State sawrkar dangin mipui tana hamthatna tur ngaihtuaha theihtawpa an hmanhlel laiin, ZPM sawrkar chuan electric bill leh bill dang reng reng tihsan loh an intiamna bawhchhiain nasa taka electric bill an tisang chu mipui zah lohna leh palzutnaah an ngai tih a sawi bawk.