RAM DAN’ HI ENG ATAN NGE?

L Sailo

Mizote hi DAN (ram dan) nihphung-ah hian kan hriatna a la sâng vak lo hle mai. He lama kan hriatna tizau tur hian Legal Awareness (dan nihphung sawi zauna lam) erawh neih a ni fo tawh thin a. Chu’ngahte chuan khawtlang sualna leh crime a lo awm ni khuaa hman tur ‘Misual kan manin kan vaw ve thei em?’ tih lamte, ‘Pawngsual tuartu hmel leh a hmingte media-a tarlan hi hrem theih a ni’ ti zawngte, bakah, HIV, Corporal punishment, POCSO … tih lamte a ni ber thin a. Amaherawh chu, hetiang lam dante hi, hriat atana tha ni tho bawk mah se, khawtlang mipui tam berte tan hman ngai vak loh leh hriat tul ber ber an ni hran lo.
Dan chungchanga khawtlang mipui tam berte tana pawimawh leh tul, kan hriat makmawh ber zawk chu, kan ram dante hian kan ram hi eng tianga kal turin nge a duan, chutah chuan he ram khua leh tui (citizen) kan nih angin enge danin chanvo mi pek, tih lamte hi a ni zawk a. Chu bakah, kan ram hruai tura kan mi thlan Minister, MLA, MP-te hi kan ram danin, ram hi engtia hruai turin nge a tih, enge ram leh mipui laka an mawhphurhna leh an tih tur tih lamte hi a ni bawk a. Heng lam hi inhrilh hria-a inzirtirin, mipui mimir hian awareness nei nasa ta zawk ila, kan ram pum tan mai ni lo, chhungkaw tin leh mimal tin pawhin kan hlawkpui theih tur a ni zawk. Mahse tam tak chuan, ‘Chutiang lo hriat viau chu enge a hlawkna tur? Hre eng ang mah ila, kan ram hruaitute’n an awm dan an tidanglam dawn chuang si lo, tun ang bak enge kan nih phah chuang ang?’ kan ti mai thei! He ngaihdan hi a dik hauh lo. Kan ram danin kan ram awm dan tura a duante leh, chumi anga kan ram hruaitute hnenah eng mawhphurhna nge a pek tih lo hriatte hi, mipuite’n kan ram leh kan ram hruaitute kalphung a tha zawnga kan her danglam theih nan, a bul tanna dik leh a kawng awmchhun a ni ber zawk!
Tunah hi chuan mipuite hian kan ram kalphung tur dik, danin a duan angte leh chumi mila kan ram hruaitute ram hruai dan tur lam hi kan hriat loh (awareness kan neih loh) em avang hian, kan ram hruaitute hi lal (thlan LAL tiin), danin a phuar ve loh, an duh ang anga thil tithei ni hian kan hmu a ang ber a. Anni lahin chutia lal ang maia dan pawh zawm lova an duh ang anga thiltithei nia kan ngaihna atthlak tak takte chu remchanga lain, anmahni leh an party chu an ‘lal’na hmangin dana leng loin an invulh a. Dan ang lo leh dan bakin an mi duh zawng tupawh duhsak bingin, hnathawkah an la a, work order, contract …etc lian pui pui an pe a, chu’ng dan ang loa an thiltih ang angte pawh chu an thuneihna ve renga an tih emaw mipuite’n kan ti zel a ni ber a. Chutiang kalphung hnuaiah chuan eirukna a lo hluar a, mipui sum tam tak ram tan ni lo-ah a pelhe pur pur a, mipui nun hruaisualin a awm a, ram chu intodelh zawnga hmasawn thei loin a rum a. Chu’ng chu mipuite’n eng hriatpui tum lova kan ram hruaitute kan se zawl chhuah thin azarah, dan ang aia an duh ang ang zawka ram an kalpui thin rah a lo ni ta a ni.
Mahse kan ram hruaitute hi dan hnuaia awm, dan ang zel chauha ram hruai tur, chutiang taka awm tura khunkhan thei ang bera ram pum hmuha intiam thlap an ni si a. An intiamna-te lah an intiam lai bakin an hre zui lova, mipuite pawhin eng awmze nei tura ngaih nachang kan hre hek lo. Mipuite ber pawhin awmze neih tir nachang pawh kan hriat loh chu, awmzia a nei thei ngai ta lo reng a. Kan ram hruaitute hi an thuneihna lah a sang a; thil dik lo chhuitu, Police, Anti-Corruption Bureau (ACB), Lok Ayukta-te leh sawrkar hnathawk zawng zawngte thleng hian an thuhnuaia mi vek an ni a, chuvangin heng hmanga han daikhalh phak chi lah an ni lo. An daikhalh hneh ngei dawn e tun tum chu, tihchang han awm bawk thin mahse an tal pit leh thei nge nge zel thin.
He laiah hian mipuite’n kan hriat tur chu, a daikhalh theitu awm chhun chu tudang ni loin keini mipuite kan ni, tih hi a ni. Inthlana anmahni paih thlakin maw? Ni lo! Inthlanah pawh paih thla ila, duh hun huna dan zawm loh system hi kan politician atu-ate pawhin an thanhnan tawh a nih avangin, inthlanah pakhat paih thla mah ila, kan thlan tlin leh-ate pawh a hma system pangngai thanhnan tawhtute tho an ni thin a, awmzia a awm thei ngai lo. Chutih laiin mipuite’n kan ram hruaitute kan thunun theih dan hi a takin kan hmu fo tawh thin thung a. A awmzia-ah chuan, kan politician-te inthlana tlin loh an hlau hian mipui tam tham reng reng a huhoa tihlungawi loh palh an hlau vek a, chuvangin mipui tam thamin ngaihdan / duhdan hlawm an sawi / an tihlan reng reng hi an hawisan ngam ngai loa, rem leh rem lo pawhin an tihsak / an thlawp tawk tawk thin. Entir nan: mipui tam tak awmna Kohhran-in Zu khap a duh chuan, kan ram hruaitute’n an hnial ngam lo, an khap mai. Kohhran leh mipui mimir tam berin zu rui kan hnual suat a, tunah chuan kan MLA / Minister-te zingah zu rui ngam an awm tawh lo. Tun hma chuan an tam thin. Mipuiin Kohhran Upa-te, Doctorate degree neite kan ngai sang tih an hria a, kan MLA / Minister zingah chutiang mi chu an kat nuk tawh mai a nih hi. Tin, YMA, MZP, MHIP … etc thiltih leh an nawrna lam pawh an dodal ngam lo mai ni loin an thlawp zel tlangpui.
Hetiang hi thil awmdan a nih avangin mipui tam berte hian, kan Kohhran-te leh kan NGO-te nen, a tam thei ang ber tangrualin, kan ram hruaitute hi Lok Bhavan-a an intiam thin ang ngeia kan ram hi ram dan ang zel chauha hruai turin kan duhdan an lakah, zu leh thil tha lo dang kan do thin ang hian tilang ila. Kan ramah hian thil tha lo engpawh hi, dan zawm that loh leh pehhel avanga lo awm thei chauh an ni tih theihnghilh lo ila. Dan zawm loh kan dona hi ziaka Memorandum-te theh lutin, a tul dan angin a dona seminar-te siam ni thin se la. Dan zawm loh langsar zualte phei chu kawngzawhte, tawngtai rualte huaihawt-in kan duh lohna lan tir hial ni thin bawk se la. Chutiang anga mipui tam berin. Kohhran-te leh NGO-te nen tangruala dan zawm loh hi kan do chuan, kan ram hruaitute hi ram dan zawm zawngin an insiam tha lo ngam miah lo ang tih a hriat a ni.
Kan ram hruaitute hi hetianga mipuite’n an laka boruak kan siam ngai lova, dan anga ram leh mipui min hruai tur hi an ni a. Hnam fing ho zingah chuan, an ram hruaitute’n an ram dan hmangin ram an kai-hruai a, mipuite pawh ram dan zawm a, chu chu thanhnana an neih theihna tur zawngin an hruai thin. Chu chu ram hruaitu an nih chhan ber leh an mawh ber a ni tih an hria a ni. Chu tak chu ram ropui, hnam ropui, chak leh hausa an nih theihna bul pawh a ni. Keini ramah erawh chuan a chunga kan sawi ang khian, kan vanduai a, kan ram hruaitute hi chutiang an ni ve lova. Min finchhuah a, dan zawm zawnga kawng thaa min hruai aiin, ram mipuite kan mawl sihhnipna laite remchanga lain, ram pawikhawih zawnga anmahni invulhna remchangah an la vak zel a, chu chu politics thiam chhinchhiaha an ngaih a ni. Chu chu politics an man dik lohna pawi lai ber pawh a ni ta reng a. Amaherawh chu, a chunga kan sawi ang khian, mipui tangrual talin sawrkar siam theia kan mi vote tlin apiangte chu, he an politics man dik loh kalphung hi hnuchhawn a, ram dan ang chauh zela ram an kaihhruai thiltih engkim titurin boruak siam sak ila. Chumi-a kan hlawhtlin chuan inthlan apianga ram hruaitu tha kan vote chhuak thei ngai lo leh chutiang vote chhuah tur a awm ngai lo hi a bo tawh ang a, kan ram pawhin a takin kawng dik a zawh thei tawh ang
Tichuan, RAM DAN-te hi thu buai hla buai a lo awm ni khua atan chauh an ni lo a, kan ram rorel leh inkaihhruaina kawng tinrenga hman tur a ni zawk tih hria ila. Tin, kan khawtlang nun, chhungkaw nun leh kan mimal nun-te thleng pawha a mila inher rem tur kan ni zawk a ni. Mi thenkhat chuan, engtinnge kawng engkimah ‘dan dan’ kan tih vek sen ang, danah hian thil zawng zawng a inziak vek seng si lo, kan ti mai thei. Ni e, kan thiltih engkima thiltih dan tur kaihhruaina chu, ram danah hian kan beisei angin a awm vek seng kher lo ang. Mahse chutiang hunah chuan, kan duh dan danin thil kan tithiang tihna a ni ngawt chuang lova. Kan tihtur zawk erawh chu: kan hman duh lai dan chuan a pumpui ngaihtuahin, enge a tum, enge a tinzawn, kan zir anga, chumi mil leh chumi ti-hlawhtling tur zawng (within the framework of the law / in the armpit of the law) zel chuan kal kan siam tur a ni. Hetianga ramin dan a la neih lohna area emaw, kan neih kim tawk lohna emaw, a tla bal lai emaw leh, a hman dan tur chiang lo laite, kan khawvel danglam leh thang chho zel kara a lo awm chuan, Legislature lam hian chutiang chu vai a, a tul anga dan an siam belh emaw, an tihphuisui zel emaw hi a ngai fo reng a ni.
Dan hi mipui mimirte’n ram siam that nan-a kan hmanraw neih chak ber leh ropui ber, thil tha lo laka kan inphenna leh kan beih let theihna hmanraw hriam ber a ni a. Tin, kan ram Court-te, a hniam ber atanga a sang ber thleng pawhin dan hi tun din an tum ber leh an lungphum ni sa a ni bawk a. Chuvangin zawm loh leh palzut mai maiah mipuite’n kan ram dante hi i phal ngai lo ang u.