Tribal Power, Dreamhunter leh Albatross te’n video insiam tawm dawn

He Mizo band ropui pathumte hian, Tribal Power frontman OP-a hla phuah — ‘Isu, I hnen ka rawn pan e’ tih hla hmangin music video hi siam an tum a, recording pawh an peih fel thawkhat tawh. A
Recording an zo thawhkhat tawh a, a video lam an buaipui mek. Venghnuaia HC Recording Studio-ah recording an ti a. Music video hi Mawitea, RDS-in a buaipui a ni.
‘Isu, I hna ka rawn pan e’ music video thar an buaipui turah hian a hla phuahtu OP-a, Dreamhunter vocalist Muanpuia leh Albtaross vocalist ni thin, tun hnua kohhran upa a nih avanga band chawlhsan titih tawh Rintea te an zai dawn a ni. Kum 50 ral kai thiau tawh an ni.
Band pathuma an guitarist-te, Tribal Power guitarist VL-a, Dreamhunter guitarist David Z Hmar leh Albatross guitarist Hmingpuia te’n guitar an perh dawn a, guitar solo an nei theuh dawn.
Albatross vocalist Rintea chuan, “Kan tlangval tan chhoh a, Pu OP-a hla phuah nalh ka tih em em chu ‘Isu, i hnen ka rawn pan e’ tih hi a ni a. Kan kum te a lo tam chho ve zel a, inhmuhkhawm mai mai pawh a harsa ve tan tawh. Mahni buaina mual mualah kan buai vek tawh a. Eng chen nge kan zai zel theih dawn kan hre lo a, hun tha Pathianin min pek lai hian Pathian ropui nan ngei, a hla phuahtu Pu OP-a, kum leh zai lama ka senior bakah, zai lama ka senior Pu Muanpuia te min zaipui a, recording neihpuihah ka sawm a. Tin, Tribal Power, Dreamhunter leh Albatross guitarist theuhte guitar solo min neihsak turin ka sawm bawk a, min remtihpuia ka lawm hle,” tiin Thalai Huang a hrilh.