Kum 8 chhung Madrid-a diriam hlawh tawh Vinicius Junior!
Kum 8 chhung Madrid-a diriam hlawh tawh
Vinicius Junior!
Thawhlehni Champions League play-off match pakhata Real Madrid-in si khat faia mualneitu Benfica an hnehna game a hmuna entu Spanish football expert Guillem Balague chuan Lisbon khaw khelmual Da Luz stadium-a Spanish giants chakna goal awmchhun khungtu Brazilian mihang footballer thiam si, lehlam pawl tana ngeiawm bawk si Vinicius Junior-a’n Spain leilunga chi inthliarna lam hawi zawnga beih a tawh (racist abuse) nasatzia a chhui a, thlirpui teh ang.
Benfica an hnehna inkhelah goal a thun a, a vun rawng avanga chhaihnawmnah leh diriam a tawh nasat thin em avangin a goal thun lawm pawh a duhthawh hret a, yellow card hmanga zilh a tawk hlak a, chu chu kha match-a a thawnthu tawpna a ni lo lehpek a, goal mak a thun hnuah Brazil forward hian a hmel chhuanawm loh tak leh a vun rawng avangin diriam a hlawh leh a, hei hi Balague chhinchhiah danin kum riat chhung Real Madrid thuam a inbel tak hnua heti zawnga beih a tawh tum 20-na a ni ta!
Khawvel huap pawha chi inthliarna lam hawi zawnga footballer beih tawk nasaber ni hiala chhal theih Vinicius-a’n heti ang thil a tawh hnuhnun ber leh tharlam ber kha Benfica midfielder Gianluca Prestianni ka atanga chhuak niin, a kawr hak laia a hmuihmai hliah chungin Argentine hian tawngkam mawi lo takin Real player hi a tawng khum a, a bulhnaia a thusawi hre pha Madrid player-te chu an teh nghal hak a; a hnuah Real Madrid player-te lungawi lo hian danin a phalsak angin khelmual an chhuahsan a, minute 10 lai inkhel a khaihlak phah ta nghe nghe a nih kha!
Prestianni hian an puhna chu pha engang mah se Vinicius-a team-mate rualte khan an thianpa hlavang kha an hauh na hle a, a bik takin mihang thlah kal zel ni ve bawk Frenchman Kylian Mbappe phei chuan Argentine kha a va hau sek a; a hnuah France captain hian media mite hnenah Benfica nena an inkhelh chhung khan chi inthliarna lam tawngkam (racist term) tum nga lai a beng hriata cheh a nih thu a sawi!
Inkhelh banah Benfica boss Jose Mourinho chuan boruak tialh zualtuah Vinicius Junior kha puhin, Amazon Prime Video Sport hnenah, “Khati ang goal mawi danglam bik thuntu chuan zahawm takin a goal tihluh a lawm tur a ni a, lehlam pawl chochhuak zawnga khawsa tur a ni lo,” tiin Brazilian a dem a; Benfica chu chi inthliarna kalpui ching (racist football club) an nih lohzia nemnghet turin he team-in player a neih tawh zinga ropui ber Eusebio pawh black a nih thu a sawi.
Uniao de Leiria, FC Porto, Chelsea, Inter Milan, Manchester United, Tottenham Hotspur, AS Roma leh Fenerbahce manager hlui Portuguese chuan sawi zawmin, “Ni e, a rilru an lo hliam pawh a ni thei, mahse, a tha zawnga nungchang lantir mai tur a ni ngai a, boruak tihluhlang zawnga chet thawh kher kha a tih tur a ni bik lo.”
Real Madrid manager hlui Mourinho hi Thawhlehni inkhelah khan hun tawp dawnah yellow card tum hnih hmuh vangin hnawhchhuah a ni a, return leg-ah Santiago Bernabeu technical area atangin a team a kaihruai thei dawn lo.
Estadio da Luz-a thliahranna a tawh kha Real a zawm hnua khati ang deusawhna a tawh tum 20-na a nih thu tarlan a ni tawh a; Madrid thuam a inbel chhung hian Spain ram stadium tam takah a hanna leh hmelhmai chhuanawm loh ve tak avangin hmuhsit a tawk chamchi a; amah avang hian Valencia leh Mallorca khaw fans thenkhat pawhin stadium lut thei lo tura hremna an tawh phah hial tawh a ni!
Racist abuse doletna atana La Liga chet dan hian fak pawh a hlawh viau a, mahse, hrem loha relhbo chu a tam zawk an la ni!
October 2021 a ni a, Camp Nou Clasico-ah Barcelona fan pakhat chuan an thlak avanga khelmual a chhuahsan laiin Vinicius hi a lo aunawmnah a, mahse, police lamin tawngkam chehtu tak hi an zawn chhuah zawh loh avangin Camp Nou case chu hrem nei loin tihtawp a ni!
March 2022 pawh khan Mallorca fans chuan Brazilian mihang chhaihnawmnahna hmanrua atan a huhoin zawng hram angin thawm an chhuah a, balhla hmin lo turin an au bawk!
Kha chet dan avang khan thuneitute chu thinrim viau angin lang bawk mah se Mallocan-ho lakah khan eng hremna mah lekkawh a ni lo!
Spanish football programme pakhat El Chiringuito an tihah pawh Spanish Football Agents’ association hotu lawk ber Pedro Bravo an tih chuan Vinicius chu zawng kawsak anga khawsa tawh lo tura hriattirin, lehlam pawlte laka zahna lantir turin mi zawng zawng hriatah Real forward a zilh a, chu bak baka racist abuse awm theia a lan loh laiin he mihring pawh hi hrem loh bawkin a chhuak!
A hnuah Bravo hian X-ah thupha a chawi a, kha kha thuneitute tan hrem loh chhan tling a ni chek a ni’ang chu maw! Spanish football thuneitute dawhtheihna khan Brazilian mipui thinrimna a chhawk lo khawp mai!
September 2022-ah pawh stadium kawtah khelmual chhunga an pawlte tana chimawm Vinicius tinzawn chungin Atletico Madrid fans lamin racist abuse an lantir a, eng thubuai mah ziahluh a ni lo!
January 2023 khan lei pakhatah Vinicius-a jersey haktirin nautelem chu khaihlum anga lantir a ni a, an thiltih avang khan supporters’ group pakhat Frente Atletico member palite chu thla 14 atanga thla 22 chhung lung in tang tura hremna pek an ni zet a, mahse, he hremna hi a hnuah pawisa chawia thlak niin, order tihchhuah tawh pawh kenkawh a ni lo thak!
A hnu thla engemawti chhung chu Vinicius diriamna hmun hrang hrangah lantir ni mah se hrem tuar ta an awm hriat a ni lo zel!
Valencia khelmual Mestalla-ah khan May 2023-ah Vinicius-a lawm zozai tawh lo chuan amah hliamtu mipuite chu khelmual atangin a ep ve rap a, mahse, tah pawh khan a chechhe zawkah tang zui lehin, extra time-ah Valencia goalkeeper Giorgi Mamardashvili nen an inhnialbuai a, Hugo Duro hmaiah a chum sak bawk avangin hnawhchhuah tawkah a tang leh!
June 2024 kha chuan Brazilian chunga hleilentute’n an phu tawk hremna an hmu ve ta nge nge a, fan pathum chu thla riat chhung lung in tang tura hrem an nih bakah kum hnih chhung inkhel en tura stadium chhung luh khap an ni a, khati ang tak hremna kha Spain leilunga a thlen vawi khatna a ni nghe nghe!
Chu thil thlen hnu March 2024-a Mestalla khelmual a han lut leh chu Valencia fans lamin nasa mangkhengin Real forward kha an lo ‘boo’ khum tehreng a, khati ang ‘chorus of boos’ hnuaiah pawh khan Brazilian mihang a zam duh bik therte tawh lo a, an auhnawmnahna chu goal hnihin a chhanglet ngat a, a goal thun lawmin a kuttum chung lamah a zial ve ngat!
Mestalla khelmuala a kir atanga ni 11 a liam leh tihah Champions League match-a Atletico Madrid leh Inter Milan inkhel tan dawn teh daiah Vinicius laka racist abuse thawm hriat tur a awm leh a, Real Madrid lamin kha thil thleng kha thuneitute hnenah report bawk mah se hate crimes prosecutor’s office lamin hma an lak zui thawm hriat tur a awm lo!
Chu thil thlen atanga ni nga hnuah Osasuna khelmuala pungkhawm thenkhatte chu ‘Vinicius die’ tiin an aurual leh bawk!
Kum 2024 September ni 29 a ni a, derby match-a Atletico Madrid leh Real Madrid inhmachhawn tur vuakvetah Brazilian mihang deusawh turin social media lamah hate campaign thawm hriat tur a awm leh hluai a, kha thil kaihhnawihah khan mi pali man an ni.
Tun February thla Copa del Rey semi-final match pahat zawka Los Blancos-in Real Sociedad an hmachhawn tum pawh khan referee Jose Maria Sanchez Martinez chuan Spain rama chi inthliarna thawm rikchhuah thulha inkhel kal tluang lai chawlh lailawk tir theihna dan ‘anti-hate protocol’ an tih hmangin match a titawp a; kha erawh player dang an auhnawmnah vang a ni phawt a, mahse, camera lamin hun pekbelha Vinicius tinzawn chunga fan pakhat zawng lemchang lai a la fuh leh tho tho!
Khelmual chhunga chuti ang thawm leh chetna hriat leh hmuh tur a awm hnuah club lamin stadium chhunga aurinna leh TV lian (PA system & LED screen) kaltlangin inthliarna lam hawi thawm (xenophobic chants) khap tlat a nih thu puan zui a ni.
Thla hmasa mai khan Real manager ni chunga Alvaro Arbeloa debut-ah Bernabeu club leh Albacete-te’n Copa del Rey match an khel a, tah pawh khan fans lamin Brazilian bawk bitum chungin racist abuse an lantir leh hram!
La Liga lamin kha thil thleng kha na takin an dem a, diriam tawk player an thlawp tlat tih thuchhuah siamin an lantir a, chu bak hremna lekkawh thawm hriat tur a awm zui lem lo!
Tunah Lisbon incident kan hre leh a, Vinicius Junior chunga thil thleng hi a zozai ta khawp mai!
A chunga thil thleng thin chungchang hi Vinicius chuan post siamin heti hian X-ah a tarlang:
“Mi tam takin ka thil tawn tawh leh tawn mek tawp hlei thei lo hi enliam mai mai turin min hrilh thin a, a thenin ka beihletna chuan awmzia a neih tak tak loh avangin diriamtute chu engahmah ngai loa football khelhsan hmiah hmiah turin min hrilh bawk.
“Keiin ka sawi fo thin dan chu – kei hi racism tuartu (victim of racism) ka ni lo a, diriam chingte khengbettu (executioner of racists) ka ni zawk.
“Spanish history-a chi inthliarna avanga lung in tang tura thiam loh chantir hmasakberte kha ka tana hnehna a ni mai lo a, mihang player zawng awngte tan hnehna a ni.”
UEFA Champions League
Knockout round play-off
Thawhlehni result
Galatasaray 5-2 Juventus
Benfica 0-1 Real Madrid
Monaco 2-3 Paris Saint-Germain
Borussia Dortmund 2-0 Atalanta
Nilaini result
Qarabag 1-6 Newcastle United
Bodo / Glimt 3-1 Inter Milan
Club Brugge 3-3 Atletico Madrid
Olympiakos 0-2 Bayer Leverkusen