Kolasib district-a kawng siam mek leh a kaihhnawih sawiho

Kolasib district-a kawng siam
mek leh a kaihhnawih sawiho
Kolasib district huamchhunga national highway thawmthat chungchang leh tunhnaia NHIDCL laka pawl thenkhatin lungawiloh an lantir chungchanga hmalakna chu Ningani khan district bawrhsap Robert C Lalhmangaiha kaihhruaiin sawikhawm a ni.
Bawrhsap chuan tunhnaia lungawiloh lantir a nih laia buaina lian zual a awm lohna atana thawktute chungah lawmthu a sawi a. Kawng siam hna chu chak zawka kalpui tur leh an intiamna anga hun ruat chhunga hlenchhuak ngei turin NHIDCL a chah. Hemi rual hian, sum a awm a nih chuan a hun takah contractor-te bill tang pe chhuak turin NHIDCL thuneitute a ngen bawk.
Kolasib SP Lalrinpuia Varte pawhin buaina liantham zawk a thlen lohnan police-ten theihtawp an chhuah thin tih a sawi a. Muanna a awm theihnan magistrate leh YMA-te thawhpuinaah lawmthu a sawi a ni.
Thutkhawmah hian NHIDCL aiawhte chuan an intiamna anga an hna chu a hun taka zawh an tum tih sawiin, hma an lakna atana mamawh an thlen nghal a. Kolasib Joint VC aiawh, YMA leh MJA aiawh pawhin an duh ber chu kawng tha neih a ni, tiin, kawng tha zawk a awm theihnan sawrkar leh NHIDCL nen theihtawpa thawhho zel an inhuam tih an sawi a ni.