India-Pakistan remna siampuituah Trump-a inchhal leh
India-Pakistan remna siampuituah Trump-a inchhal leh
New Delhi-in mi dang inrawlh an awm loh thu vawi tam a sawi hnuah US President Donald Trump-a chuan May thlaa India leh Pakistan indona titawp tur khan palai hna a thawk tih a sawi thar leh.
Board of Peace-in hun an hmanaah Trump-a hian ‘indo thlawhna 11 kah thlak a ni’ tia a sawi thin pawh a sawi leh a, hei pawh hi India chuan a dik lo tih a lo sawi tawh thin bawk.
“Pawisa tam tak an hloh dawn tih an sawi khan indo kan duh lo tih ka sawi a… indo thlawhna 11 kah thlak a ni a, man tam tak tak a ni,” tiin US president hian a sawi.
Trump-a tun hnai thla eng emaw zat chhungin India-Pakistan buaina kha a tihtawp niin vawi 80 chuang a sawi tawh a. A sawina hmun hrang hrangah thlawhna kah thlak zat a sawi pawh a dang fo bawk.
Tun thla tir khan president hian thlawhna kah thlak hi 10 niin a sawi a. Nikum khan panga tih a losawi tawh a, August thlaah pasarih tia sawiin November-ah pariat a ti leh a, 10 sawi leh tawhin 11 tiin a sawi thar leh ta bawk a ni.
Heng bakah hian Trump-a hian sumdawnnaa inremna siampuiah leh chhiah laksakah ram pahnih hi a vau avangin indona hi an titawp tih lam hawiin a sawi thin bawk a, hei pawh hi New Delhi chuan a dik loh tih a sawi tawh thin.
“…Ka bia a, ka hrilh a, an ngaithla a, an tawp loh chuan sumdawnnaah inremna ka siampui loh tur thu ka hrilh ve ve a… A hnuah chuan rang takin inremna kan duang a. In indo chuan chhiah 200%-a sang ka laksak ang che u tih ka sawi ve ve a ni,” a ti.
Thu a sawi laklawk laiin hian Trump-a hian Prime Minister Narendra Modi-a pawh sawi chhuakin an intawh khawm chu ‘a lo thlir’ niin a sawi a. “Prime Minister Modi ka bia a, a phur a, tunah pawh min lo thlir a ni,” a ti.
Jammu & Kashmir-a Pahalgam-a mi firfiakte chetna a thlen hnuah May thla khan India-in Pakistan-a mi firfiakte awmhmun a kap a, hemi chhanga Islamabad a chet hnuah Delhi nen ni li an indo hman a. Trump-a hian inkahhai puantirah a inchhal tam a, India erawh chuan a nih loh thu a sawi chamchi thung.