TIRH CHHUAH HMASAK BERTE HNENA THUCHAH – 2
Rev Dr Ramengliana
Kar hmasaa khan Lal Isuan a zirtirte a tirh chhuah hmasak ber tuma a thuchah thenkhat ka rawn ziak chhuak a. A tuiawm hlein ka hria a. Tunlai khawvelah kan hriat nawn fo a pawimawhzia pawh ka zu hmu thei a ni. Amah berin a sawi ngatte hi kan ngai pawimawh zo lo fo a, mahni thiam leh tha tih zawng hian kan kal nasain a lang. A sawi hi a chiang a, a peh hel kual ve lem lo. |awngkam thiama thuam mawi a tum teuh lo va, idea tharlam tak hre bik anga han chhawp chhuah a tum ve lo a ni. Thil nihna dik tak leh a duhzawng tak chu a sawi fak mai.
Hnathawktu chu ei hmu tlak a ni
“In kâwnghrênah rangkachak emaw, tangka emaw, dâr tangka emaw pai suh ula, zin kawng atân iptê emaw, kawr pahnih emaw, pheikhawk emaw, tiang emaw keng hek suh u; hnathawktu chu ei tûr hmu tlâk a ni si a.” Mathaia 10:9-10
Lal Isuan a zirtir 12-te a tirh chhuah hmasak ber tum hian Pathian rinna avanga an tih tur dik tak tha taka ti a, thil dangin intihnawk lo turin a zirtir nasa hle. Rawngbawltute tibuai thei thil tam tak a hmu lawk a ni tih a chiang. Eng nge kan ei ang a, eng nge kan in ang? Engtin nge kan khawsak zel ang? tih zawhna hian vawiin thlengin Pathian rawngbawltute a tibuai thin a ni. He lungkhamna hian mi tam tak thlarau nun a tibuai fo.
Tunlai khawvela hun puma rawngbawltu tibuaitu tam tak chu hemi piah lam hi a la ni cheu mai. Ei leh in, silh leh fen pangngai piah lamah khawsak nawmna thil hian a tibuai thin bawk a nih hi. Kohhran a lo phuisui a, Pathian mite nambar a lo tam hian sum leh paia hnianghnarna a lo keng tel a, an mi chhawrte an enkawl hneh tak viauah chuan damchhung khawsak nawmna te pawh hian thui tak hruai kawi thei a ni. Hmelmapa hian mihring chak lohna ruam hi a hre em em si a!
Isua hian a zirtirte hi pawisa leh thil dang rinchhan tur pakhat mah kawl lo turin a ti hmiah mai. Pathian chauh an ring dawn a nih chu. Pathianin a enkawl hneh leh hneh loh pawh an tawnhriat ngeiah a lang fiah ang. A rawngbawltu, Chanchin Tha hriltute chu a tluangtlam thei ang bera nung turin a beisei a. An mamawh ang ang chu Pathianin a pe mai dawn a ni. Mihring pawhin hna thawktu na na na chu hlawh hmu tlaka kan ngaih chuan Pathian chuan a rawngbawltute chu a an mamawh a va pe dawn tak em!
Chanchin |ha hnawltute
“Mi tu pawhin an lo lawm loh che ua, in thu pawh an ngaihthlâk loh chuan, chu in ata emaw, chu khua ata emaw in chhuah hunin in kea vaivut chu thing thla ang che u. Thu dik ka hrilh a che u, rorêl ni-ah chuan chu khaw tuar tûr ai chuan Sodom leh Gomora ram tuar tûr chu a ziaawm zâwk ang.” Mathaia 10:14,15
Lal Isua hian a mite hi a hauh na hle. Hei hi hotu tha zia a ni tih kan hria. Chanchin Tha hril turin a ti a, a thu awiha an hril phawt chuan hlawhtlin leh hlawhchham lamin a teh lem lo va. Inhawng takin an lo dawngsawng thei tih a hria a, an lo inkharkhip tlat thei bawk. Chu chu a zirtirte mawhphurhna a ni lo.
Hetah hian Chanchin |ha hlutzia kan hmu. Lo hnawl ngawt hlauhzawmzia nen. Isua thu sawi hi ngaihthlak mai aiin a na a ni awm e. ‘Kea vaivut thing thla’ tih hian mawhphurhna hlen pangngai piah lamah ‘duh lohna’, ‘hnawlna’, ‘diriamna’ thlengin a kawk a. Juda hovin Jentail ram an chhuahsan dawna an tih dan a ni. Juda khuain Chanchin Tha an lo hnawl vaih chuan an chan tur chu chutiang chiah chu a ni ve thung. Juda mi nihin a chhan dawn chuang lo a nih hi.
Isua hian a sawi zawm zel a. Chanchin Tha hnawltute dinhmun chhiat turzia chu Sodom leh Gomora mi sualte mei leh kata hal ral vek an nih aia chhe zawk kha a ni dawn. Sodom leh Gomora mite Pathianin a hremna hi Juda rilruah chuan inhremna rapthlak ber a ni a. Chutiang chu Chanchin Tha hnartute chan tur a ni a. Chutiang thu pawimawh chu an keng a ni tih a hriattir nghal bawk a ni.
Chanchin |ha dawngsawngtute
“Khaw lianah emaw, khaw tê-ah emaw, in luhna apiangah, thlenna âwm, mi zawng chhuak ula, in chhuah leh hma chu chutah chuan thleng reng ang che u. Ina in luhin chibai bûk ang che u. Chu ina mite chu chibai bûk tlâk an nih chuan in thlamuanna thu chu an chungah thleng rawh se; an tlâk loh erawh chuan in thlamuanna thu chu in chungah lo kîr leh rawh se.” Matthaia 10:11-13
Isuan a zirtirte a tirh chhuah khan tunlai tawng taka ‘confi’ hle turin a ti a ni ber a. An thuchah chu chatuan nunna thu a ni a, thu zawng zawnga thu hlu ber an sawi a, an theh darh a ni tih inhria se a duh a ni ngei ang. Tin, chutiang chatuan thu an sawi chuan tha taka dawngsawngtu an lo awm ngei ang a, engah lo ngai vak lem lotu pawh an tawng bawk ang.
An zinnaah hian ‘thlenna awm’ zawng chhuak zel turin a ti a. A awmzia pawh an thuchah lo tuipui ve a, an rawngbawlna lo hlutsaktu tihna ni tur a ni. Chutiang mi nen chuan inkungkaihna tha neih zel a pawimawh. Duhsak pawh an duhsak bawk ang. Tin, a nawmna lam apianga insawn lawr mai mai lo turin a ti bawk a nih hi. An hril Chanchin Tha phuin a hriltute chu an awm tur a ni, tih hi a thupui chu a ni – zahawm tak leh rintlak takin.
Judaho chu ‘Shalom’ (I chungah thlamuanna awm rawh se) tiin chibai an inbuk thin a. Chu ‘Shalom’ (remna, muanna, nih tur ang nihna) chu an induhsakna pawh a ni. Isua hian a Chanchin Tha duh lo va lo hnartute chu buaipui zui tehchiam tul a ti lo a ni ber a ni. ‘Shalom’ pawh chu an neih theih turah a ngai lo a ni ber awm e. He Shalom hi Lal Isua nena inzawm tlat a ni tih hi theihnghilh lo ila.
“Trendy progressive Christians insist that if we just love a lot and don’t rock the boat, everyone will receive us and welcome us. Sorry, but no go. The most loving and gracious man to walk the earth was Jesus, yet still the world rejected him.”
Bill Muehlenberg