Thlanawma music video 10-na

Thlanawma music video 10-na
Tunlai mipa zaithiam lar, kohhran huangah ani aia sawm hlawh an awm bik lo ang tih tur khawp, Lalthlanawma’n music video thar a nei leh ta.
Praise On 2024-a pakhatna Thlanawma music video thar hi ‘Van kawtthler’ tih a ni a, youtube lamah en theiha dah a ni.
‘Van kawtthler’ hi a music video 10-na a ni a, thla khat vel an buaipui.
Praise On-a pakhatna a nih hma khan music video pakhat a lo nei tawh a, chumi hnuah pakua a siam tawh.
“Hla hi, hetia a ena en theiha dah hi a tha ka ti a, mipui pawhin music video hi an duh niin ka hria a, kan hla, a ena en theiha dah hian hlain mi rilruah a thawk nain ka hria a,” tiin music video a ngaih pawimawh chhan a sawi.
Thlanawma hian philosophy-ah research a ti mek a, music lamah pawh a duh angin a inhmang vak thei rih lo.
“Ka research hi ka ngai pawimawh a, ka zawh fel hma chu music lama thuk taka inhmang thei ka ni lo. Ka zawh fel hunah Pathianin rem a tih chuan music hmanga rawngbawlna lamah thuk zawka kal theih ka inbeisei,” Thlanawma chuan a ti.