Online-in taxi rate kalpui tum

Online-in taxi rate kalpui tum
Mizoram sawrkar chuan khawpuiah taxi rate chu online-a inpek lawk theiha kalpui tumin a inruahman mek.
Transport minister Vanlalhlana sawi danin, taxi (four wheel) leh two wheeler taxi rate chungchangah mipui atangin complaint a awm fo thin a, tuna rate hman lai hi State Transport Authority (STA) ruahman leh bituk niin, zawm that a ni lo niin an hria tih a sawi. Hei vang hian phaia an tih angin, online booking system anga kal an tum a, an inbuatsaih mek tih a sawi. “Chutih hunah chuan taxi fare a mumal deuh tawhin a rinawm,” a ti.
Two wheeler taxi chu a tangkai rualin Aizawlah chuan a tam ta lutuk a, a indip deuha hriat a ni tih a sawi a. District headquarters bakah two wheeler taxi service theihna tur khaw lian zual deuh 24 chhinchhiah a ni tawh a, local council/ village council emaw NGO ten an khuaa an mamawh dan an rawn thlen anga, hei hi STA-in a zirchiang anga, an khaw population milin permit hi an pechhuak thin dawn tih a sawi a ni.