MPSC full commission tir thuai ngen

MPSC full commission tir thuai ngen
Mizo Zirlai Pawl chuan sawrkar chu Mizoram Public Service Commission full commission-a kaltir thuai turin a ngen tih a sawi.
MZP Gen. Hqrs. thuchhuak chuan, MPSC chu Mizoram tana hna pawimawh tak tak thawk tur latu a nih avang leh, Mizo thalaite beiseina venghimtu a nih avangin thalai hna zawng mek tan rintlak ni chhunzawm zel turin a duh, tiin, ‘Tunah MPSC-ah chairman leh member pakhat chauh an awm a, a enkawltu tur secretary neiloin hun rei tak a awm tawh bawk. MPSC hi full commission-a a awm thuai theihna turin member rintlak ruat thuai tur leh secretary pawh dah thuai turin MZP chuan Mizoram sawrkar kan ngen a ni,’ a ti.
India-in Mizote bomb hmanga a beihna champha, March 5 – “Zoram Ni” tia hman thin chu kuminah pawh MZP chuan hman a tum a, “I ram leh hnam humhalh la, khawvelin a dem loang che” tih thupuia hmangin programme neih tum a ni tih a sawi.
Mizo thalai tam zawkin competitive exam an inbuatsaihna tanpuitu atan coaching institution leh college naupang tel theihna tur Civil Service Challenge Quiz chu May-a neih an tum bakah Inter College Debate Competition pawh April-a neih tum a ni tih a sawi bawk.