Lungleia State University dahna tur Bill siamthatna House-in a pawm

Kum 2025-a State Legisalative Assembly-in a pawm tawh, Aizawl-a a hmunpui dah tur Mizoram State University chu Lunglei-a awm zawk tura tihna chu State Legisalative Assembly vek hian a pawm.Nilainia Assembly Session-ah Higher & Technical Education minister Dr Vanlalthlana chuan The Mizoram State University (Amendment) Bill 2026 chu House-ah a pharh a, member 26-in an sawi hnu ah pawm a ni.
H&TE minister hian Bill siamthatna tur pharh a ngaih chhan a sawi a. The Mizoram State University Bill 2025 chu 2025 March 4 khan State Legislative Assembly-in a pass a, State University din a nih theihnan thawktu tur post siamin, vice chancellor leh registrar Search Committee din a ni a, post tul zual lakna atan advertisement chhuah a ni a, State University hmun atan Geology & Mining office Luangmual Aizawl tihfel tura hma lak a ni tih a sawi.
Heti chung hian, Bill pass a nih hma khan Lunglei, Champhai leh Mamit atangin State University thuthmun dil a ni a, heng lai bial MLA leh NGO te pawh titipui an ni a. 2025 November 17-a council of minister thukhawm chuan Lungleia State University headquarters dah a nih theihnan hma la turin H&TE minister chu ruat tih a sawi bawk.
“He thila kan ngaihtuahnaa lian ber chu ‘regional imbalance’ a ni a. Aizawl atanga sawn nia sawi hi, Aizawlah hian kan la dah hman chiah loa, a hmunte kan en chauh a, a hmun hi thlak a ni, tih kha official-a kan sawina chu a ni,” a ti.
Eptu lamin nikuma Bill hmasa sawihonaah Lungleia dah duha tang nasa an nih avangin awlsam taka an pass pui theih mai a beisei tih a sawi a ni.
Bill sawihonaah eptu party-te chuan, nikuma Bill hmasa sawiho tumin Lungleia dah turin an tang a; ruling member lamin Aizawl-a dah a tul zawk dan an sawi a, Lunglei lam MLA-te pawhin Lungleia dah zawk turin na takin an tang loa, tuna taka Lungleia dah a tul dan an sawimawi leh si chu a diklo, tiin, Aizawl-a dah tura Bill pawm vek tawh, Lungleia dah zawk tura tih leh tak chu a fel tawk loa, Lungleia dahna tur Bill hi a thar hlakin siam leh nise, tiin an sawi.
Leader of opposition Lalchhandama Ralte chuan, hetianga dan siamsa, a taka hman a nih hmaa siamthat leh chu a dik loa, Assembly zahawmna vawnhimna atan pawh pass loh a ngai, tiin, “Hetianga kan ti rau rau a nih chuan rilru nghet neiin, university thuthmun hi sawn tawh lo turin kan ngen,” a ti.
House leader Lalduhoma chuan, tuna House-a an sawiho chu a Act a ni loa, amendment lai chauh a ni a. Cluster tur college 5 an thlanchhuah pawh a ngai vekin an awm anga, pass ngai chu a office awmna tur sawnna a ni mai, tiin a sawi.
Lungleiah hian State University hmunhma zawng zawng dah dawn pawh nise, mimal inpe leh tuna college ram awmsa nen, hun lokal zelah chuan dah theih dan a awm thei dawn tih a sawi a. Leitlangpui, chhimlam mipui tan ZPM-in bat an nei ve hrim hrim a, heti zawnga eptu member-in an ngai a nih pawhin a awm lo hran lo tih a sawi bawk.
Bill puluttu H&TE minister chuan, State University din hi Congress sawrkar khan Aizawl area anga ngaih theihin Aibawk-a dah turin ruahmanna an nei a, ngaihtuah zui a ni loa; sawrkar tharah kum 2020 atangin ngaihtuah chhoh a ni a, Study Team indin mah se, an ngaihtuah thui hman loa, draft bill-ah Aizawl-a dah turin an ti a. ZPM sawrkar chuan beih inhuamin, nikuma thutlukna an lo siam tawh chu mipui duhdanin an kal ta zawk niin a sawi.
Khatih hunlai khan Aizawl-a dah a tul chhan a awm, tiin, Cluster of Colleges Scheme hi a tawp tawh naa, allotment an siam an la pe kim loa, sum an dawn ve theih it-in Aizawla dah dan kan ngaihtuah ngar ngar a, hmun dang an hawi ngam lo tih a sawi. Central ministry lamin an chhang beidawng a, he scheme-a an luh theih loh avangin khaw dang an hawi a, Lungleia dah an titlu ta tih a sawi a ni.