Zalenna puan kum 60 tlin lawm dawn

Zalenna puan kum 60 tlin lawm dawn
Mahnia ro inrela zalenna famkim nei tura Mizo Nanational Front-in 1966 March 1-a zalenna a puan chu kumin March 1 hian a kum 60-na a tling a. Zalenna puan Diamond Jubilee hi MNF chuan a lawm dawn.
MNF zalenna puan Diamond Jubilee hi kum khat chhung lawm a ni dawn a, 2027 March 1-ah khar a ni dawn tih a sawi. A hawnna hi March 2 hian Aizawlah hman a ni anga, MNF president Zoramthanga’n a hawng ang.
MNF treasurer Lalruatkima chuan, Diamond Jubilee lawmna thupui atan “Zalenna sang ber neih hi Mizote chanvo a ni,” tih hman a ni a. Zalennapuan hriatreng leh mei mit loa chhawmnun reng chu Mizote tih tur a ni a, hnam rilru putna atanga he mawhphurhna hi MNF chuan la in Mizo zawng zawng lenna leh kimna turin Jubilee hi lawm a ni dawn tih a sawi a. “Zalenna suala fehchhuak hnam pasaltha zawngzawng Diamond Jubilee lo thleng tur pual hian zahna chibai kan buk a. Kan Jubilee hman turah hian tel vek turin kan sawm a ni,” a ti.
Diamond Jubilee pual hian MNF office- Mizo Hnam Run kawtah lung phun a ni dawn a. A lawmna pui ber Aizawlah hman a nih rual hian MNF Sub-Headquarters, District Headquarters, Block leh Unit hrang hrangah remchan dan anga hman a ni dawn tih a sawi a ni.
Zofate thendarha awm a, kumkhuaa hnam dang salbehna hnuaia awm reng chu thil nih dan turah an ngai loa, mahnia ro inrel a, Pathian kaihhruainaa zalenna sang ber neih chu kan chanvo a ni tih an la pawm reng tih MNF hruaitu hian a sawi a. A hun leh ni tur erawh hnama min dintu in rem min la ruat sak ngei ang tih chu an innghahna a ni tih a sawi.