KTP inkhawmpuia kal sing 2 chuang

KTP inkhawmpuia kal sing 2 chuang
Saitual-a Kristian Thalai Pawl inkhawmpui neih mekah Zirtawpni tlai thleng khan palai inziaklut 20500 an tling tawh.
KTP General Conference vawi 61 hi Ningani zan atang khan Saitual Public Playground-ah tan a ni a. Zirtawpni tlaia palai in report hi mi 20500 an chuang tawh.
Zirtawpni chawhma inkhawmah 2025 report an pe a. KTP member mipa 109456 leh hmeichhia 71675 an awm a, belhkhawmin 181131 an ni. Kum 2024 khan member mipa 107535 leh hmeichhia 70013 (total 177548) awmin punna hi 3583 a ni. Branch malin Mission Veng Branch-ah member an tam ber a, 1447 an awm. Paren Branch (Kohima bial) ah member an tlem ber a, 3 awmin hmeichhia vek an ni. Member 10 awm tlin lohna branch dang 6 an awm bawk.
Kum 2025 chhung khan KTP member mipa 502 an thi a, hmeichhia 67 an thi. Member thi zat atangin mipa thi tamna hi zaah 88.2 a ni. Kum 2024-ah mipa 541 leh hmeichhia 74 (a vaiin 615) an thi. Member thi awm lohna KTP bial 50 a awm a ni.
Inneih chungchangah kum 2025 khan KTP member 1610 chu biak inah (dan khatna) an innei a; hmundanga innei 1825 an awm. Innei zawng zawng atanga chhutin biak ina innei hi zaah 46.87 an ni. Mizoram chhung leh pawnah KTP bial 218 awmah biak ina innei tam zawkna bial 76 a awm a, hmundanga innei tam zawkna bial 123 a awm. Biak ina innei leh hmun danga innei inzatna bial 13 a awm a, innei awm lohna bial 6 a awm. Biak ina innei awm lohna bial 17 a awm a, hmun danga innei awm lohna bial 3 a awm bawk.
Thawhtanni zan KTP inkhawm danah, kum 2025 khan chawhrualin member 41058.15 inkhawm ang an ni a, member zawng zawng atanga chhutin zaah 22.66 a ni. Kum 2024-ah chawhrualin 40063.11 (22.56%), kum 2023-ah 38188.86 (21.59%) a ni.