Aizawlah Science Day hmang

Mizoram Science, Technology & Innovation Council (MISTIC) bultumin India ram puma hman thin ‘National Science Day’ chu Zirtawpni khan Aizawlah hman a ni a. Directorate of Science & Technology (DST), MISTIC, Mizoram Remote Sensing Application Centre (MIRSAC) leh Mizoram Science Centre (MSC) bakah science kaihhnawih zirna in leh pawl hrang hrang hruaitute bakah zirlaite an tel.
Planning & Programme Implementation secretary Lalmalsawma Pachuau chuan Science & Technology-a thawktute chu ram hmasawnna innghahna pawimawh an ni tih a sawi a. Sik leh sa danglam dan data an lakkhawm, ram leilung dinhmun leh riruang thlalak GIS map an buatsaih thin leh Zoram mil technology an zir thinna chu Mizoram-in ei leh bara intodelhna kawnga hma a lakna hrang hrang, lo neih leh a kaihhnawih – agriculture & allied sector-te tan pawh thil pawimawh tak a ni tih a sawi a ni.
Mizoram Science Centre curator Dr Lalrinkimi chuan hmeichhiaten science lama hma an sawn dan leh Mizo hmeichhe hlawhtlingte a sawi a. NIT Mizoram dean (Academics) Sukanta Roy bakah scientific officer pahnih – Dr Lalchhandami Tochhawng leh Lalchhuanmawia ten thu an sawi bawk.
Chawhnu hunah scientist, professor leh entrepreneur-te nen thupui hrang hrang sawia zirho a ni a. MIRSAC, MSC, Mushroom Centre, Patent Information Centre, Innovation Facility Centre, State Climate Change Cell, India Met Department leh National Institute of Technology Mizoram ten exhibit item hrang hrang an entir a ni.