A pasal hmun ruak luah turin Sunetra Pawar-i thlang

On Feb 28, 2026 35 0

A pasal hmun ruak luah turin Sunetra Pawar-i thlang
Maharashtra Deputy Chief Minister Sunetra Pawar chu Ningani khan Nationalist Congress Party (NCP) national president atan a pasal thi tawh, Ajit Pawar aiawh turin lungrual takin an party national executive meeting-ah thlan a ni.
Kum 62 mi, Sunetra Pawar hi Sharad Pawar leh Ajit Pawar-te hnua national president pathumna a ni a, hmeichhe hmasa ber a ni bawk a. January 28-a Baramati-a thlawhna chesuala a pasal thih hnuah party rorelna a chelh ta a ni.
Sharad Pawar kaihhruai NCP (SP)-in NCP pawl pahnih inzawmkhawm tura an nawr hnuah he hmalakna hi tih a ni a. Sharad Pawar-a din party hi kum 2023 June thla khan an party MLA tam zawk nen Ajit Pawar-a a hel hnuah an inthen.
Sunetra Pawar hi a kaisan hnuah NCP legislative unit hotu a ni dawn a, an party thununna a keng dawn a, thla hmasa khan an pa aiawhin deputy chief minister atan thutiam a tiam bawk.
Party chief tur hian national executive committee meeting-ah a hming hi party working president Praful Patel chuan a rawt a. Hmun hrang hrang atanga palai kalte chuan kut phar chungin an thlawpna an lantir vek a. “NCP chief thar atan Sunetra Ajit Pawar-i ka puang,” tiin Patel-a hian NSCI Dome Worli-ah a puang zui a ni.
Patel-a rawtna hi Maharashtra NCP President Sunil Tatkare-a’n a thlawp a. Sunetra-i hian a kut pahnih vuanin lawmthu a sawi a. “Chhiat kan tawk a; mahse, Ajit Dada hnen atanga infuih tharna lain hma kan sawn tur a ni a. Sunetra ‘Vahini’ (Marathi tawnga mote tana duhsakna tawngkam hman thin) hruaitu nihnaah hian Ajit Dada (Pawar) kaihhruainaa kan hmuh tur ang kha kan hlawhtling ngei ang tih ka ring,” tiin Patel-a chuan a sawi.
January 28 khan NCP president leh deputy chief minister, Ajit Pawar-a hi thlawhtheihna chesualah a thi.
A nupui kalsak hi a chanvo thar chelh tura official-a ruat tur hian Ningani khan a chenna, ‘Devgiri’-ah party core committee koh a ni a. Core committee meeting-ah hian working president Patel, state chief Tatkare leh Pawar-i pawh an tel a. A hnuah hruaitu hlun – Hasan Mushrif, Chhagan Bhujbal, Dhananjay Munde, Dilip Walse Patil leh a fapa pahnih — Parth leh Jay te pawhin meeting-ah hian an tel ve niin NCP hruaitu pakhat chuan a sawi.