Maharashtra-a puak thei siamna hmun puakah mi 20 thi

Maharashtra-a puak thei siamna hmun puakah mi 20 thi
Pathianni tuk khan Maharashtra-a Nagpur atanga km 35 vela hla, Kalmeshwar-a Raulgaon khuaah silaimu siamna hmunah na taka thil puak avangin mi 20 vel an thi a, mi 15 velin hliam na tak an tuar.
District thuneitute chuan SBL Explosives Ltd-ah hian zing dar 06:00-a zing lam hna thawkte hna tan hnu lawk, dar 06.45 vela puak a ni a. A puah lai hian thuneitu pahnih enkawlna hnuaiah hnathawk 35 vel a chhungah an awm a, kangmei nasa tak a chhuak nghal a, minute tlem te chhungin hmun hi a tualchhuak nghal vek a ni.
Company hi puak thei siamtu lian tak a ni a, thil laih chhuahna leh in lian sakna hmuna hman thin puak thei dehpuahna leh puak thei kartut pawh a tel a. Kang thelhtute thleng nghalin Kalmeshwar police-in chhanchhuah hna an thawk nghal bawk a. Ambulance-in hliam tuarte hi Nagpur-a damdawi in hrang hrangah enkawl turin an phur a.
“Chhanchhuah hna kan thawk mek a, tun dinhmunah chuan thi zat dik tak hriat chian a harsa hle a ni,” tiin Inspector General of Police Sandip Patil chuan a sawi.
Police, kang thelhtu leh district thuneitu te chu puak leh thei a awm em tih an ngaihven nghal a. A him nia puan a nih hnuah hmanhmawh takin chhanchhuah hna thawh tan a ni a, chhanchhuah hna thawktute chuan thil chim chhe kara tangte lak chhuah tumin hma an bei a ni.
Superintendent of Police (SP) Harssh A. Poddar chuan chipchiar taka chhui chian a nih nghal thu a sawi. “Technical leh scientific investigation kan kalpui mek a, senior officer-te chuan tunah leh a hnu lama hmalakna zawng zawng an buaipui ang,” a ti bawk.
Maharashtra home minister hlui, NCP (SP) hruaitu, Anil Deshmukh pawhin a tlawhin a lungawi loh thu a sawi.
“Nagpur-a puak thei factory-a bomb puak nawn fo thin te, Solar Industries India Limited-a thil thlengte pawh ngaihtuah hian nikum September thla khan Chief Minister Devendra Fadnavis hnenah hetiang thil thleng venna atan hian he biala puak thei unit zawng zawngte him dan zam zawm dan en ka lo phut tawh a ni,” a ti.
He hmunah hian puak thei siamna unit sawmhnih vel zet a awm a. Solar Industries hi India rama hmanraw tha tak tak siamtu zinga tel a ni a, ram venhimna atana hman chi silaimu leh sumdawnna atana hman chi thlenga siamna hmun a ni a. Kum 2023 khan an hmun pakhatah thil puak awm tawhin hnathawk pakua an thi a ni.