Aikal latu mi 37 chungah action la tawh
Thawhlehnia Assembly Session-a zawhna chhangtu Department of Personnel & Administrative Reforms minister K Sapdanga chuan, aikal lak tihtawp a nih theihnan sawrkarin nasa takin hma a la a, aikal late chu a tul anga hrem zel an ni tih a sawi.
Aikal lak avangin an chunga action lak sawrkar hnathawk 37 zingah hian 29 chu chawlhtir an ni a, midang 8 chu hremna tenau leh zilhauna pek an ni tih sawiin, Tourism department atangin chawlhtir 18, Power & Electricity atangin chawlhtir 7, School Education atangin chawlhtir 2, General Administration Department leh Health & Family Welfare atangin chawlhtir 1 ve ve bakah Higher & Technical Education atangin hremna tenau leh zilhhaua warning pek 8 an awm tih a sawi a ni.
Loh theih loha aikal lak ngai awm ta se, sawrkarin dan siam a tum em, tih zawhna chhangin DP&AR minister chuan, “Sawrkar ngaihdanah chuan loh theih loha aikal lak ngai a awm thei loa, chutianga thawk thei lo an awm a nih chuan Mizoram Special Voluntary Retirement Scheme 2024 siam a ni,” a ti. Tun thlengin sawrkarin aikal lak dan siam a tum lo tih a sawi bawk.
Aikal lak hian India danpui a bawhchhia tih a sawi a. Sawrkar hna tam zawk chu confidential-a vawn chi a nih avangin, sawrkar hnathawkte chauh thawh tur a ni a, aikalte chu sawrkar hnathawk an ni lo tih a sawi.
“Sawrkar hna lak dawn chuan India danpui Article 14-na leh 16-na an leklam a. Article 14-na hi, mitin intluktlanna a ni a, hamthatna siam a nih dawnin, tu mimal mah thlim thiang a ni lo. Article 16-naah chuan sawrkar hna lak dawnin a dil thei, dil duh zawng zawngin an dil theih turin puanzar tur, tih court order a awm a. A dil theiten an dil theih loh, a ruka tuten emaw duhsak zawng lak mai emaw officer tuten emaw dan zawm loa an lo lak mai emaw kha a remchang lo. Chuvangin aikal lak hian dan a bawhchhia a ni,” K Sapdanga hian a ti.
Aikal la zep ru an awm a nih chuan department head leh controlling officer chungah ngainatthiamna awm lo tur a ni a. Report chauh niloin, rinhlelh deuh hriat a awm chuan chhuizui zel a ni tih a sawi bawk.