Iran-in Khamenei-a vui hun sawn hla

Iran-in Khamenei-a vui hun sawn hla
US leh Israel sipaiten an ram pumah nasa taka beihpui an thlak chhunzawm zel karah Iran-a thuneitute chuan Supreme Leader Ayatollah Ali Khamenei-a vui hun an sawn hla.
Thuneitu sang pakhat chuan Tehran-a prayer complex-a ni thum chhung awh tur hun hman turah hian tel duhte atangin tel phalna tam tak an dawng tawh tih sawiin a hmunhma buatsaih a ngai tih a sawi a. Ruahmanna hmasaah Nilaini zan atanga tan tur kha a ni.
Hetihlai hian Assembly of Experts member pakhat chuan clerical body chuan Inrinnia US leh Israel-te beihpui thlak tan tirh lama thi, Khamenei-a thlaktu tur thlan chu ‘a hnaih hle tawh’ tih a sawi.
Iran hian an ram beihna chhan let nan Israel leh Gulf rama US hmunhma beiin missile leh drone hmangin nasa takin a kap.
Iranian thlarau lam hruaitu leh thuneitu lu ber, Khamenei-a hi Inrinnia US leh Israel sipaiten beihpui an thlak tan ni khan Tehran-a a chennaah a nupui, an fapa puitling zinga pakhat leh hotu lawk eng emaw zat nen an thi.
Kum 86 mi puithiam hi ni thum chhung awh tur vuina hun hi Nilaini zan dar 10:00 (India-a zanlai dar 12:00)-a tan tur a ni a, an khawpuia Grand Mosalla prayer complex-a a ruang an dah chu amah zahna lantir duhte tan tlawh an phal.
Hetih lai hian Nilaini tuk khan Tehran province-a Islamic Propaganda Co-ordination Council hotu chuan Tasnim news agency hnenah inkhawm hi ‘hun remchang dang’ atan sawn tura thutlukna siam a nih thu a tar lang.
Seyyed Mohsen Mahmoudi-a ‘inkhawmah hian tel tura ngenna tam tak leh mipuite lo dawnsawn theihna tur hmun remchang siam a ngaih vang’ a nih thu a sawi.
Khamenei-a thah a nih hnu hian Islamic Republic thlawptu mipui pungkhawmte chu Tehran-ah US leh Israel ten an beihna duh lohna an lantir niin sorkar chanchinbu chuan a tar lang a. Hetih lai hian social media-a video darhah khawpui lian leh hmun danga kawngpuiah lawmna lantir lai a lang bawk.
Khamenei-a hi kum 1989 khan Islamic Republic dintu, Ayatollah Ruhollah Khomeini a thih hnuah supreme leader a ni a. Iran-a politic leh a sipaite thlawpna nghet tak changin a rorelna kalphung dodalnate pawh a hmet mit zel a, a chang chuan tharum thawhna pawh a hmang thin.
December thla tawp leh January thla tir lama an ram pum huapa sorkar laka lungawi lohna lantir lai pawh khan mi tam takin paih thlak emaw, a thih emaw an duh tih an lantir a. A thupekin venhim hna thawktute chuan mipuite hi bei letin mi 6,480 vel an thi niin mihring dikna chanvo humhalhtute chuan an sawi.