Manipur buai zel, hel nia rinten mi pahnih that, in paruk hal

Manipur-ah tharum thawhna a thleng chhunzawm zel a, hel nia rinten Ningani khaw var hmain Kamjong district-a Kultuk khua an beihnaah mi pahnih an thi a, in paruk an hal bawk.
Naga civil mi bo nia hriat ruang parukte Jawaharlal Nehru Institute of Medical Sciences (JNIMS), Porompat thlenpui a nih hnu lawka thleng niin hei hian state pumah boruak a titang zual hle a ni.
Police thuneitu sang chuan, “He pawikhawihna hi zing dar 4:30 velah a ni a, silai keng pawl, ralthuam tha tak tak nei an ni a. Khaw mi pahnih an thi a, pahnihin hliam an tuar bawk a. Hliam tuarte hi damdawi in panpui nghal an ni,” a ti.
Nilaini tlai atang khan JNIMS-ah hian thi chhungte, khawtlang hruaitute, mipui aiawh leh mipui tam tak pungkhawmin ruang thlen hun an nghak a. Police-te sawi danin damdawi ina ruang thlenpui atangin buaina a chhuak zui nghal a, venhim hna thawktuten pungkhawmte hnawh darh nan tear gas an kap a, hun rei vak lo hnuah an hmet dai thei.
Venhim hna thawktute leh mitthi chhungte thinrimte inkara buaina chhuak a ni ber a, thlahna hnuhnung neih tuma pungkhawmte pawh an tel.
Ruangte hi him takin JNIMS ruang dahnaah dah a ni a. Zanlai pelh hnua ruang hi thleng a nih avangin post-mortem examination pawh tih nghal a ni lo va. National Investigation Agency (NIA) leh security agency danga hotu liante pawhin damdawi in hi an thleng ve bawk.
Ruang parukte hi Kangpokpi district-a Karam Vaiphei khuaa hmuh an ni.
Naga ruk bote ruang hmuh a ni tih thuthang chuan state chhung hmun eng emaw zatah lungngaihna leh buaina nasa tak a thlen a ni.
Senapati district-ah mi tu tih hriat lohten bungraw phur truck-te chu Karong area-ah an hal nia sawi a ni a. Naga People’s Front (NPF) pisa pakhat chu mipui thinrimin an bei bawk.
Nilaini tlai tawh takah khan Tameiah hetiang bawka thinrim pungkhawm leh mipui inhawrkhawm a awm bawk.
He tualthahna thleng chungchangah hian United Naga Council (UNC) chuan Ningani zing dar 6:00 atanga Zirtawpni zing dar 6:00 thleng Naga chenna hmun zawng zawngah a vaia inkharna tur thu a puang a, na taka an dem thu sawiin, lungngaihna tuar chhungte an tawrhpui thu an sawi a, Manipur leh sorkar laipuiten an siam an thil phutte ngaihtuahsak an nih hma chuan ruang hi an dawng dawn lo tih an sawi bawk.
A thil phut pawimawh zingah hian Kuki firfiak pawlte nena Suspension of Operations (SoO) inremna hlihsak te, ruk bo leh thahnaah inhnamhnawih nia sawite man leh thubuai siamsak te, Kuki National Front-President Group (KNF-P) chu firfiak pawla puan te, Deputy Chief Minister Nemcha Kipgen-i bân te a tel.
Hetihlai hian Chief Minister Yumnam Khemchand Singh chuan tun hnaia tharum thawhna thleng chu pawi a tiin a lungchhiat thu a sawi a, mi paruk thah an nih chu na takin a dem thu a sawi bawk.