White House-ah Messi leh a pawlte an leng

White House-ah Messi leh a pawlte an leng
Nimin khan MLS Cup trophy an sualchhuah tak nen Lionel Messi leh a Inter Miami team-mate rual chuan White House-ah United States president Donald Trump an tlawh.
Inter Miami hian nikum December thla khan American top-flight division Major League Soccer championship game-ah hnehna changin, an club chanchina a vawi khata atan MLS title an hlawhchhuak a, Iran do buai lai mah ni se White House chuan Miami hi an hawhtlinna lawmpui turin lengah an sawm a; zanin hian coat suit hlipin Washington khawpuia MLS match-ah DC United an luhkhung zui leh nghal dawn a ni.
England captain hlui David Beckham-a neitu nihna club player-te hi an captain Messi hoin White House-ah hian an lenglut a, president Trump chuan lo dawngsawngin, dawhsanah media an hmachhawnho nghe nghe.
Israel nen inthuruala Iran an do dun mek chungchanga thuthar a sawi hmasak zet hnuah Trump chuan a inlengte lam a hawi a:
“Ka fapa (Barron) chuan, ‘Ka pa, vawiina lo leng turte hi i hria em?’ tiin min zawt a, kei chuan, ‘Hre nang, thil thleng leh buaipui mek ka ngah lutuk a’ tiin ka chhang a, ani chuan, ‘Messi maw le!’ I fan lianpui a ni leh nghal. Ani chuan pa ropui tak niin a ngai che a, tunhma lama hmaichhana lo hmu tawh zawk tur i ni asin’ tiin min hrilh,” a ti.
Argentina icon Messi hian nikum October thla khan Miami-a a hmalam tifel lehin, kum 2028 thleng daih tur contract thar a ziak a, a khawsak mekna ram behchhanin kumin world cup pawh a khelh ngei a rinawm.
Barcelona leh Paris St-Germain forward hlui Messi hi MLS history-ah a zawna season hnih chhung Most Valuable Player award dawng thei awmchhun niin, Trump pawhin hriata mual mual a nei ve ngei a nih hmel a, kum 38 mi chungchang sawiin, “Leo hi FIFA World Cup MVP tang lai niin, a career-a a tum 47-na atan trophy a hlawhchhuak a, awihawm loh hial zawka record turu a ni.
“Khawvel khawi hmunah pawh i kal thei a, i duh duh team i zawm thei a, Miami i rawn thlang chat a, he zinkawnga min hruainaah hian lawmthu hrilh che ka duh a ni.
“Ka upat tawh avangin tuna ka sawi leh tur hi sawi lo tur awm tak ka nih laiin han sawi ta tho ila; Pele inkhel kha ka en tawh a, Pele ai khan i tha zawk em tih hi ka hre lo a, Pele kha chu a thiam a ni,” tiin tunge khawvela footballer tha ber tih chungchangah ngaihdan chiang tak a neih loh thu a lo hrilh!
Trump hian Brazilian legend Pele bakah Miami coach Javier Mascherano leh soccer great dang Cristiano Ronaldo-te pawh a fak luam a, a thupui ber erawh Messi leh a inleng Florida team a ni thung.
US president hian tun nipui thawt laia Fifa World Cup leh a hnu lama Olympics an thlen tur chungchang a sawilang tel bawk.
June ni 11 atanga July ni 19 chhungin Canada, Mexico leh US-a khawpui 16-ah team 48-in World Cup an khel dawn a, World Cup leh Copa America defending champion Argentina innghahna chu Messi bawk hi ni leh tura ngaih a ni.
He hunah hian Lionel Messi chuan US President 47-na Donald Trump hnenah number 47 inziahna jersey bakah football leh sana a pe.
President Joe Biden-a hun lai January 2025 khan Presidential Medal of Freedom ceremony-a tel tura sawm a nih laiin eight-time Ballon d’Or winner Messi hi a chawimawina dawn la turin a kal thei lo a, chuvangin, tun hi White House-a Messi lenluh vawi khatna a ni.