SUSTAINABLE, INTEGRATED FARMING IN MIZORAM – 10

RK Dawla
Mb 9366095658

1.Vau thla kan chuangkai a. Khua a la lum uchuak lova, zan lam phei chu favang boruak ang mai a la ni a. Farṭuah leh Vaube an pâr vul mêk a, ramhnuai thing hnah an chawrno ṭan mêk bawk. Chutiangin kan thlai kumhlunte pawh. Tui hlutna a sâng chho mêk a, kangvar thlai chi kan thlâk leh mêk bawk. Ram nuam tak leh sik leh sa diverse tak Pathianin min pe a. Lohâl khu vanga Mizoram pum boruak chhiat lai ber mah ni se, India ram state lianhote ngaihtuah chuan, kan la zia-awm hle. White Leghorn (ar var tui tam chi) vulh kan uar chho mêk a. Nakin lawkah chuan state dang aṭanga artui kan lâkluh ṭhin pawh kan la intodelh thei thuak ang. Sawrkarin farmer-te sawhthing a lei mêk a, hmun ṭhenkhatah erawh a la lei mumal lova, kuthnathawktute vui thawm a ring sâwt hle. District capital, khawpui chhung kawng siam mêk a ni a. Inter-capital road siam erawh an thawk muangin thawktu an indaih rih loh hle niin a lang. A bikin Kanghmun S to Lunglei kawng hian a tlangdung mipuite beisei a pha lo rih deuh. Healthcare system erawh kan nei ṭha ta hle a. Mitethei pawh phai Damdawi In lianah kan damlo ve ngam ta!
2.Kan chaw rinpui ber hi buh a nih miau avangin, buh thar lamah ṭan lâk kan la ngai nasa ang reng a. Kumkhat lo neih vanga ramngaw kan suat nasa lutuk vên nân, Wet & Dry terrace farming hmanga hlawk zawka buh thar tam tura ṭan lâk uar kan ngai hle. Thingtlang mi tam ber thlawhhma neih chhan chu buh, hmarcha leh sawhthing chin duh vang a ni a. Heng zingah hian buh hian natna a do chak ber a, ramchhungah kan ei ral tam ber bawk. Hei vang hian kan lo tih tawh dan ṭhin pêla buh thar tam tura ṭan lâk nasat kan ngai hle. Sawrkarin district ṭhenkhatah leilet buh thar leiin enchhinna hlawhtling tak a kalpui a, buh thar hralhtute pawh an lawm hle. District dangah pawh kalpui chhoh zel ni sela, a duhawm hle. Tin, buh thar hlawk (yield/area) lawmmante pawh ṭha tâwk tak siamin, buh chingtute tih-phur ni sela, hma kan sâwn chak lehzual ngei ang. Kan society-a hamṭha-sa reng, sawrkar hnathawkte hlawh leh a behbawm a pung tual tual a, chulai balance tur leh kan economy chawk nung turin sawrkar hian Agri/Horti hi uar zual zel mawlh teh se.
3.Mizoram mipui hi kan tam lovin kan thawl hle. Guwahati mipui zat awrh kan ni. Sawrkar hmalakna thlawp leh tichak tura pawlho – Kohhran, NGO nei ṭha ber kan ni bawk. Excise & Narcotics dept pawh hi kan NGO-ten thawhpui ṭha hle lo sela chuan, eng he hu an thawk kaw lutuk lovang. Chuvangin, sawrkar hian hma lian tham a lâk rêng rêngin heng pawlhote hi hmang ṭangkai thiam sela. Incentive siamsak leh an tha tiphur tura hmanrua & infrastructure ngaihtuahsak kawngah harh thar zel sela. Mizoram hi a zau lova, mihring kan thawl nuam bawk. Kan hmasawn chak theih lohna chhan lian tak pakhat chu, kan lo tih ṭhin dan kan kalsan harsa kan tih ṭhin vang a ni. Hma kan sawn zel rualin, kum 20 zet ram buai kan nih khan min hrêk deuh nge, state dang, kan level puite kan pha lo rei ta hle a, ṭan lâk nasat kan ngai bik êm êm.
4.Sawrkar thar kan nei tawh a, inbiakpawhna lamah pawh nasa takin hma kan sawn nasa. Hun danga kan kal dan ṭhin aia ṭha zawk leh fel zawkin kan kal chho mêk a. Occupation column-a farmer tih ziah pawh a inthlahrunawm loh ṭan chho viau. Chutih rual chuan, sawrkar aṭanga mimal hmalakna thlengin, a tlo tur, kan ram mil ngaihtuah chhuah kawngah harh thar zel ila. Mithiam leh hausa zawkte pawh farming-ah rawn lût zel sela, ram nuam, khualzinte paradis siam turin theihtawpin ke i pên zel ang u.