Session-in titi luah

Session-in titi luah
Budget Session neih mekah February ni 23 khan Sialkal Range Development Council Bill, 2026 an sawiho a, House leader meuh put luh ni mah se an pass lo. Select Committee kutah an dah a, mahse an tih danin legislator lo ni tawhte mit a timim.
Legislator lo ni tawh thin, hemi chungchanga biakpawhte chuan khatia kha Bill an sawi khan, Select Committee en zui tura an ti a nih chuan kha thutkhawmah vek khan Select Committee an din nghal tur a ni tih an sawi. Chutianga ti lovin February ni 25-ah Select Committee hi an din chauh.
“An hmanhmawh tawh deuh a ni mai thei a, Select Committee kha an din nghal ta lo a, din nghal tur chu a ni,” speaker hlui Lalrinliana Sailo chuan a ti.
“Select Committee din dan tur hi a awm a, chu chu an zawm lo a, a chhan phei chu kan hre lo a,” minister hlui pakhat, a hming tarlan rem lo pawhin a ti a, “Dan a awm a, kalphung a awm bawk a, kan House hian an ngai pawimawh lo em ni aw ka ti a, keini’na lo sawi ve hi a mawi lo ang tih ka hlau bawk si a,” a ti bawk.
Legislator hluite sawi dan chuan, Select Committee hi din nghal tur a ni a, legislature party tina an whip theuhte’n an aiawha tel tur an rawt ang a, chu chu a concerned minister-in member-te a hriattir ang. Sialkal Range Development Council Bill, 2026 en zui tura Select Committee an din erawh a tuk tuk lehah an din.
Session-in titi a luah a, social media-ah pawh an sawi nasa. March ni 9 khan hemi chungchang hi speaker-in a sawi chhuak hial a, “Tun hnaiah proceedings chungchang hian a tha lo zawngin sawi a hlawh ta viau mai a. Tlangkam titi leh social media lamah House chhunga member-te conduct-in sawi bawrhban a hlawh ta deuh anga ngaih theih leh speaker pawh House control tha tawk lova sawi a awm dawn dawn ta fo mai hi a lungchhiatthlak ka ti hle a,” tiin bul a tan a ni.
House kalphung, “Pu Speaker,” tih tawngkam pawhin ngaih pawimawh a hlawh lo fo a, speaker address lova mimal leh mimal emaw pawl leh pawl emaw anga inhmachhawn an awm thin. An thupui khel lai kalsana mahni vei zawng thiam taka sawi chiam te, duh chen chen sawi tum ni awm tak te pawh an awm thin.
“House zahawmna hi a chhunga mite hian vawn tum hram hram tur a ni a, ‘dawt’ tih tawngkam te, ‘zahthlak’ tih tawngkam te hi hman loh kan tum thin kha a ni a. |awngkam mawi lo hman loh tur a ni a. Kan member zahawm takte hian chutiang chu an ngai pawimawh lo em ni aw ka ti fo mai,” minister hlui pakhat chuan a ti a, “Committee-naah agenda kha sawi tur a ni a, chutiang chiah chuan House-ah pawh thu tha tak pawh ni se sawi chiam chiam tur a ni lo a. Kan agenda kha sawi tur a ni,” a ti bawk.
Tun tum Session-ah hian house leader-in Annual Report 2024-2025 of The Mizoram State Project Monitoring Committee a pharh (lay) a, legislator hluite chuan hei hi House-a pharh tur chi a ni lo an ti.