KALPHUNG THAR SAWRKAR KA THLIR LET VE A

R.Lalrinkima
Hidden Lodge
Chanmari, A izawl

Kei tehlul hian engmah hi ka hre thui tehchiam lo nain thlasik nilum ai pahin ka ngaihtuahna ka kawm ve mai mai thin a. Sawi leh sawi hnu, tu party mah hian an party member vote hi sawrkarna chelh tura vote tling tham an awm lo a, political party-a member nilo, vote thlak dawn a vote tum nei saa kalte vote bawk hian sawrkar tur party an vote tling chawk. Hei hi hriain politician chuan tangka a neih ve te taw loh chuan MLA candidate nih ve ngawt ngam a ni lo tih an hria. Sum hmanga vote lei hi langsar hauh lo mahse,sawnpai lo lang ang a ni a,zep chi rual a ni lo; tin, a awm chatuan dawn tih hi ka ngaihdan a ni. Chuvangin, political party te chuan rorelna an chan theih nan an party policy an zawrh thiam leh thiam lohah thui tak innghat mahse MLA condidate tur tangka lama mawm deuh an mamawh fo thin.Delhi-a Kejriwal pawl te kha a vawikhatnnah chuan sawrkarna chang zo lo mahse inthlan nawn anih meuh chuan an sawrkar chiang ngawt anih kha, an policy zawrh kha sum hman ngaihna chi a ni ve lo, mipuiin an duh em em a ni. Mahse,BJP chuan sum hmangin thiam takin Enforcemenr Department nena tangkawpin an phet thlu leh thung anih kha!!!
Village/Local Development Committee
Tuna kan sawrkar hrawn lai pawh hi ralkhat atanga ka lo ngaihzawn vena chu Village Development Committee,thingtlang lam khaw tinah leh khawpuiah Local Development Committee dina he committee hian an khua/veng chhunga sawrkarin hmasawnna hna a thawh apiang an vil tur niin sawi a nihna kha a ni. Mahse, chu intiamna chu tunah hian khua/veng engzatahnge an din tih hriat a chakawm hle. ZPM sawrkar kumkhat a liam meuh chuan he committee hi ding thluah tawh turah ka ngaih laiin an dinna awm chhun khua/veng chu kutzungtang zah pawh anih ka la hre lo? He committee din vat anih loh chhan chiangtaka ka lang chu-‘party mi leh sa in vulh thau phawt an tum’ tih hi a ni. Hei hian a rawn lanchhuah tir chu tun Assembly session-a kan hriat ang khan PWD ngawtah pawh tender loa hna thawh hlutna sang em em kha a ni. Ka mi hriatchian ve em em pakhat pawh an sawrkarna kum a ral hmain RCC building tha zet mai, ruling party mi leh sa nilose kum 10 hnu pawha a sak theih loh tur, a sa puitling der nia? PWD ang hian ZPM sawrkar tirh ata tunthlenga tender loha hnathawh hi Department dang dangah tarlan nise hriat a chakawm ngawt mai. Ka sawrkar hnathawh tawplama ka thuneih vena hnuaia hna thar rawn thawk Party worker thenkhat kha chuan hna petu an vau chher nasa a, an hna enkawltu te hnena thil hriatthiam loh pawh zawt loin hna petu hnenah an han zualko ti tih ngawt zel kha ania? Tichuan, VDC/LDC din ni ta lo chu party worker ten duhang thalin hna an han thawk ta a, quality assuarance lam chu an ngai pawimawh em em lo, an sawrkar chhunga hlep tha tak neih tumin an bur ngar ngar hlawm mai anih tak hi ! State Works Monitoring Committee an ti emaw ni sawrkarin a din khan, hnathawh kallai engemawzat an endik tawh a, sawrkar hmasa lama hna kallai kha an tlawh tam zawk hi a ni thei mai em? ZPM sawrkar hmaa hna kallai hna engzatnge an endik a, chung hnate hlutna,estimated amount chu engzat nge tih leh ZPM sawrkar hnua hnathawh an endik zat leh estimated amount te pawh hriat a chakawm hle. Kha Monitoring Committee Member pakhat, Senior Engineer pension bang ta daih te khan ngaihtuahna a ti thui khawp mai?
Kut hnathawktute chawikan
A pahnihnaah chuan kuthnathawktute hmangaih taka an thlai thar lei sak an tumna an tlangau pui kha a ngaihzawnawm ngawt mai. Bana Kaih policy hnuaia thiam tak maia an han sawimawi mai kha zawng kut hnathawk-a eizawng tan chuan party membership fee pek mai kha a chakawm ngawt mai, mahse mumang lam ram a tam ta riau anih hi? Sawhthing,hmarcha,aieng,hmunphiah te lei leh hralh dan turah sumdawng hausa, Zoram pawn ami te nen thuthlung an ziak awl lo a, mahse, heng sumdawngte hi thluak fim tak, chalkawlh rel rawl, an thil lei duh chu a leitu tur an nih angin a rate fel tak an siam dawn tih hi an hre lawk lo nge hrelawk chungin an sawilang duh lo tih hi ka zawhna a ni
Traffic Management.
A pathumnaah chuan Aizawl Traffic Inrelbawlna tha tak.la awm thei lo hi a ni. Co-ordination Committee on Traffic Management(CCTM) thuchhuak-lirthei nei si, garrage nei lo te tana zahngaihna hun hawn 1st October 2016 to 30th November 2017 bawhchhe lui tlatte umzui hna thawh nep tak hi a ni. He zahngaihna hun a tawp ta chiah maw tihah keipawhin finfiah nan Chanmari atangin Sikulpuikawn thleng zingkarah kea kalin ka thlithlai a, a zia deuh em maw ni aw ka ti nain karkhat hnuah chuan a ngai te bawk a ni. Tunhnaiah Gauhaty High Court thupek bawhzuiin Aizawl Traffic Police leh Tansport Department te khan 9th February,2026 khan sawrkar thupek zawm duh lote chu an han vai a, an daih rei leh lem lo a, kha huna an man te kha engzatnge pawisa an chawi tir tih te pawh hriat a chakawm hle. Mi thenkhatin ‘zana kawngsira lirthei dahin traffic a ti jam helinem’ te an han ti a, in sawithiam tumna tawngka mai a ni.CCTM in dan an siamah chuan ‘lirthei lei turin a dahna Garrage an nei tur a ni’ tih zawk hi a ni kan zawm loh chu ni.Transport Department hnathawktu indaihna avangin lirthei lei tur chuan Garrage a neih ngei leh neih ngei loh an finfiah thei lo a, Local Council kutah an dah a. Local Council member te lah vote hmanga thlan an ni a, mi tihlawm nan dawtin garrage nei angin lirthei leitu tur chu an lo recommend a(a hmunah enfiah peih hek lo), hei hian nghawng tha lo nasa tak a nei mek anih hi ! Lirthei intlanchhawk te hi traffic jam tih nep nan kan han changchawi viau nain lirthei tih tamna mai a ni, tlanloh nia lirthei pakhat chauh nei tlan theilo hian traffic jam an ti nep chuang lo, tlanloh ni nei lo khawpa lirthei ngah ho hian traffic jam an siam zawk tih hi a chiang reng. Chu-ai chuan, dan loa lirthei nei te dapchhuah hna hi khawng takin kalpui se, kan khawpui traffic jam hi chu a ziaawm sawt ang tih hi a thil chiang tak a ni reng.
Kan buaina ber nia ka hriat chu- thil tha ti duha insawia inzuar political party hian an tih tak tak ngam lo hi a ni,a chhan chu ‘rorelna chanloh hlauh vang a ni’ ti khawl mai teh ang. Tu party mah hi thil tha tih vanga tlak in huam an awm lo. Rorelna chana suma inhaivur duh tlat chuan mipui tih lungawi an ngai miau a lawm? Sikul tan hma te pawh kan ti, nu leh pa thatchhe tak tak,zing tho hma peihlo ho an han bengchheng a, opposition party in an han thlawp a, Zu chungchangah pawh in ve duh rengin duh lo niawm takin an han do a, sawrkar a tla tawp tawp mai a nih hi. Chuvangin, tuna kan sawrkar hrawn lai pawh hi a in enffiah viau a ngai ang. Chuti ni loa, sawrkar dang anga a kal ve leh naw naw anih chuan mawng sawh dawtin a tla ang a, a keh chhe viau ang’. Antam chi theh a tlakna inang lo nuaih ang khan chu sawrkarna tla chhe taa mi te chu a then Congress ah,a then MNF ah, a then a to chhun lah hnimin a dip ral turin an awmna party ah an la rinawm tlat thung dawn anih hmel e.