Service Provider-te Plus Ka tawnhriat pakhat!

Lallunghnema
Charity Lodge
Cont: 9862288182

Consumer Huang hi in ning tawh em? In kham viau em? Chhiartu thenkhat chuan hetiang Mizo tawnga Consumer right zirna hi hmun dangah a awm lo a ni, an ti thin! Mumal taka Consumer Right inhrilh hriatna leh inzirtirna he huang lo hi a la awm lo, an ti tlat! Consumer kan ni vek si.
Consumer Protection Act a awm chhung chuan Consumer in ni vek, kan ni vek, tih hi phat theih rual a ni lo.
Ti hian ka’n tlangau dawn teh ang. “Consumer ho hi” tia iak iak, harsatna nei puih ngai lo ang hrima inngai, khau phâr thawven ta ringawt Pu Ringate ang pawh hian Consumer an ni tih chu an hai der thei tawh lo. An tui bill chungchânga harsatna an neih changin Consumer Activist-te an pun âwl lo. Intichangkâng Pi Thangi te hlei hlei hian harsatna an tawh meuh chuan tu tu te emaw an pun chûk chûk thin a ni lawm ni? Consumer right erawh an ngaihven duh der si lo! A hahthlak viau.
Aizawl District Consumer Forum-a Member ka nih lai khan Quary-a lung lei chungchangah ka u Hawla, kan President nen khan kan thu a inhmu lo ve ngawt pek a. Ka U khan dawra thil lei lote chu Consumer an ni thei dawn em ni? a ti khan ka hria. Kei ta pek chuan “Ka U, Consumer chuan thil lei zawng zawng a huam vek alawm ka ti a. Ani pawh chuan a hre thiam ve ta mai bawk a.
Consumer-te hi chi hnih an awm a. Dawrkai bungraw leitute leh service leitute hi an ni. Consumer Protection Act 2019 – Sec 2(7) (I) – ah chuan –
who buys any goods……a ti a. (II) – ah thung chuan – who hires or avails of any service….. a ti thung a. Kan hriat thiam theih nan hetiang hian han sawi ila –
Consumer pakhat chuan Bazaar bungrua a lei a. Consumer dang pakhat leh chuan- thlawhtheihna ticket a lei a, thlawhtheihna company service a leisak (hman) tihna a ni.
Mi pakhat chuan electric chhit man a chawiin pawisa a pe a, P&E service a lei a ni. Hengte hi Service Provider tih an ni. Thil hralhtu chuan pawisa a dawng a, service pe chhuaktu pawhin pawisa a dawng a ni. CPA 2019 Sec 2.42-na kan chhiar chuan service chuan hengte hi a huam tih kan hre thei a ni : – the provision of facilities, in connection with:
Banking, Financing, Insurance, Transport, Processing, Supply of electrical or other energy, Telecoms, Boarding or Lodging or both, Housing construction, Entertainment, Amusement, or Purveying of News or Other Information tiin…mahse, a thlawna service hmangtute chu a huam lo. Heti hian ziak a ni.. but does not include the rendering of any service free of charge or under a contact of personal service.. tiin.
U Dawngi te ang Sap tawng inti thiamte lo chhiar atan heti hian ka han ziak chhawng teh ang.
‘The service which are hazardous or likely to be hazardous to life and safety of the public when used, are being offered by a person who provides any service and who knows it to be injurious to life and safety’. A thlamuan thlâk hle.
Tichuan, hengte hi service a ni a, service petute chu Service Provider tih an ni. Heng Bank, Educational, Institution/Institute, P&E Dept, PHE Dept, LPG Gas Distributor, Transport System chi hrang hrang, i.e; Bus, Taxi,etc) Autorickshaw, Aeroplane, Railway/Train, Maxi Cab Medical Service (eg ; Hospital etc) Medical Practitioner-te hi Service Provider an ni. Mawhphurh a nei vek an ni.
Heta kan tarlan tum ber chu Consumer kan nihna hian ramri a kham lo. Khawi hmun pawh a huam tih hi a ni. Khawi hmunah pawh Consumer interest leh issue hi a awm vek a ni. Eng lai pawhin a thleng reng. Chuvangin consumerism tel lo chuan engkim hi engmah lo a ni a. Service leitute tel lo chuan service a awm thei hek lo. Service Provider hlawhtling ni tur chuan Consumer tha neih a ngai a, rinawm taka thawh a ngai a ni.
Tin, heti hi a ni a, Consumer khawvela kan tawn hriatte chu ka sawi fo tawh thin a. Min lo chhiarsaktute kâ atangin fuihna ka dawng bawk a ni. An lo chhawr tangkai tih pawh min hrilh thin bawk. Thil tha tih hi a nih ang ngau ngauva sawi chhuah hi a tha ber lo thei a. Tuna mi pawh hi ka han sawi ang a. A changtu hming ka tarlang lovang.
Hetiang hi thil awm dan chu a ni — Pi Lali chuan an in sak lai tukverh vuah tur Alluminium Window Frame – Rs 13 lakhs man company pakhat a chah a. He tukverh (window) frame man hi a pe lâwk vek a ni. Chêng nuai 13 chu tam tham tak a ni. Kei phei chuan hetiang zat zat hi ka la hmu ngai lo! He Bungraw man hi 25. October.2024-ah Lali hian a pe tla vek (cash down ) a nghe nghe a ni. Chhuanlam dawrâwm tê tê siamin kum khat hnuah pawh a deliver thei lova. Pi Lali unaute mangang hian kei ve hi min han hrilh a, ka hnenah an zualko a ni. Tichuan, he company manager hi vawi eng emaw zat ka va ka biak sak thin a. Inhmu lo chung pawhin hmai sâ inhmuh a tam hle. Bei nge sei run dung tiin kan indawr zel a. Kan indawr dan zawng zawng sawi lo mai ila, a tawp, a tawpah chuan, Pu PL tawngkam takin bungrua chu a lo thleng ta ruau mai a! Kan lawm hle! Consumer-te hlawhtlinna chu! Ka tawnhriat dang ka rawn zep zauh zauh thin ang.
Kâr leh lamah kan titi ho leh dawn nia.
He article i chhiar atanga comment i neih chuan min hrilh dawn nia!