Billboard 2026 Women of the Year- HUNTR/X singers EJAE, Audrey Nuna & REI AMI

On Mar 13, 2026 0 0

Billboard 2026 Women of the Year- HUNTR/X singers EJAE, Audrey Nuna & REI AMI
EJAE, Audrey Nuna leh REI AMI te tan kum tha a la ni ta zel a, Billboard chuan KPop Demon Hunters film-a hmeichhe zaithiam group HUNTR/X tana aw thawhtu te hi Billboard Women in Music 2026-ah Women of the Year-ah a puang.
He chawimawina hi Billboard Women in Music ceremony, April ni 29-a Holluywood Palladium, Los Angeles-a neih turah hlan an ni dawn a ni. Kumin Billboard Women in Music event-ah hian chawimawi tura an lo puan taw zingah Teyna Taylor, Tate McRae, Ella Langley, Kehlani, Laufey, Mariah the Scientist, Thalia leh Zara Larsson te pawh an tel. He event hi Keke Palmer-i’n a host dawn a, ani hi a perform nghal dawn bawk. He show hi Billboard YouTube channel-ah an live stream ang.
Billboard co-chief content officer Leila Cobo chuan, “EJAE, Audrey Nuna leh REI AMI te kan chawimawi thei tur hi nuam kan ti a. An tan kum tha niin, record an siam deuh mawlh mawlh a, award an dawng a, khawvel huapa hlawhtlinna ropui tak an nei a, chart-ah an chungung a ni satliah mai lo a, he industry-a khawvel huap pawha hmeichhe ropui an ni,” a ti.
KPop Demon Hunters hi animated film niin, Netflix-in nikum khan a tichhuak a, a chhuah hlim atangin pop culture-ah hmun lailum a luah nghal a, Netflix-a program entu ngah ber a nih bakah a soundtrack pawh a film ang bawkin a hlawhtling a, Billboard 200 (US albums) chart-ah a No.1 a, a single HUNTR/X ten an sak “Golden” chu Billboard Hot 100 (US singles) chart-ah kar riat a No.1 thei bawk. Award lamah pawh Critics Choice Awards leh Golden Globes-ah best original song a dawng tawh a, Oscar pawh dawng thei tura rinkai a ni.
Billboard Women in Music-ah hian kum khat chhunga rimawi khawvela hmeichhe chetha te chawimawina neiin, an pualin hun an hmang thin a, he event-ah hian Women of the Year hi group anga dawng an la awm ngai lo a, kumin hi a vawi khatna tur a ni. He chawimawina hi Doechii, Karol G, SZA, Olivia Rodrigo, Cardi B, Billie Eilish, Ariana Grande, Selena Gomez, Madonna, Lady Gaga leh Taylor Swift te pawhin an lo dawng tawh.