Mizo nula te an champion

Women’s Under – 23 One Day Trophy Plate final chu Zirtawpni khan
Chandigarh-ah khelh a ni a, Mizoram chuan an khingpui Sikkim chu run 81 in an hneh a, a vawi khatna atan an champion. Mizoram hi season tharah inelna sang zawk Elite Group-ah an inlan ang.
Final-ah hian Mizo nulaten an vaw hmasa a, over 50 chhungin run 166 an siam a, mi pakua out in an chetha thawkhat hle. Mizoram tan hian Captain Lalhmangaihsangi (Mami) chuan ball 74 a hmachhawn atangin run 38 a siam a, Mizoram tan run siam hnem ber a ni. Mami bakah hian Carrie Chakma chuan run 21 a siam a, Thelma Laldinthari’n out lovin run 19 a siam bakah Jacinta Laltanpuii chuan run 18 a siam bawk. Mizoram hian Sikkim tan target hausak thawkhat tak run 167 an hnutchhiah.
Sikkim vuak hun a thleng a, an target khum ngei tumin tan khawh bawk mah se Mizo ball vawmtute (bowller) an ngam lo hle. Mizoram tan hian Bualpui nula Sandhia Rai chuan wicket 7 zet a la a. ZD Lalnunrili’n Wicket 2 lain, Margareth Malsawmliani’n wicket 1 a la bawk a, over 28.5 chhungin an out fai vek a, run 85 chiah an tlin thei a. Group match ah run 44 laia an lo hneh tawh Mizoram chu inkhel pawimawh tak final-ah run 81 ngawtin an hneh lova, uiawm takin an tlawm ta a ni.
Final-ah an chak theih nan Mizoram tana thawhhlawk tak; Wicket sarih ngawt latu Sandhia Rai chu Final Player of the Match atana thlan a ni a, a phu hle. Sandhia Rai hian Tournament khelh chhungin wicket 15 zet a la a, Wicket la hnem ber a ni nghe nghe. Mizoram an champion theih nana thawhhlawk, khel tha tluang tak All rounder Jacinta Laltanpuii, New Chalrang chu Player of the Series atan thlan a ni bawk. Jacinta hian inelna neih chhungin run 290 a siam a, wicket 12 zet a la tling bawk
BCCI hnuaia inelna hrang hrangah Mizoram in hma a sawn tak zet a, inelna an hmachhawn 15 zingah tum sarih ngawt final lutin, vawi thum an champion hial a. Hei hi tui lete hnu lama an chet that ber tum a ni. Cricket Association of Mizoram (CAM) chuan Women Under 23 Team player te leh coaching staff te a chhuang takzet a. CAM chuan tun season hman meka a hlawhtlinna tawn hrang hrangah cricket family, player te leh malsawmna petu Pathian chungah lawmthu a sawi tak meuh meuh bawk a ni.