David Gilmour-a guitar-in guitar hralh to ber record a siam

David Gilmour-a guitar-in guitar hralh to ber record a siam
Pink Floyd frontman David Gilmour-a ‘Black Strat’ electric guitar chu March ni 12, 2026 khan New York-a Christie’s auction-ah dollar maktaduai 14.55-in an hralh a, khawvela guitar hralh tawh zawng zawnga manto ber a la ni.
He electric guitar hi Gilmour hian Pink Floyd album hit zet mai 1973-a an tlangzarh ‘The Dark Side of the Moon’, 1975-a an album ‘Wish You Were Here,’ leh 1979 album ‘The Wall’-ah pawh a lo hmang tawh niin The New York Times chuan an tarlang.
He guitar hi an lilamnaah hian online a chhangtu te minute 21 chhung an inlehthal zak zak hnuah a tawpah dollar maktaduai 14.55-in an hralh ta a, khawvela guitar manto ber a ni ta a ni. A hmaa hetiang record siamtu chu Nirvana frontman thin Kurt Cobain-a ‘Martin D-18E’ acoustic guitar kha a ni a, he guitar hi April ni 5, 1994-a a thih hma lawkin Cobain hian MTV Unplugged-ah a perh a, 2020 khan lilamnaah dollar maktaduai 6.01-in an hralh a, guitar manto ber a ni thin a, tunah chuan Gilmour-a guitar hian a rawn khum ta a ni.
Gilmour-a guitar hi Pink Floyd hla lar tak tak ‘Money,’ ‘Comfortablu Numb,’ leh ‘Shine on You Crazy Diamond’-ah record-naah te pawh Gilmour hian a lo hmang tawh thin a ni. He guitar hi hralh to theih tura rinkai sa a ni a, dollar maktaduai 2 atanga maktaduai 4 vela tihral theih an inbeisei a, mahse, dollar maktaduai 14.55-in an hralh ta a ni.
He Fender Stratocaster guitar dum hi Gilmour hian 1970 khan New York-a Manny’s Music store, Manhattan atanga a lei niin an tarlang a, tunah chuan a lo upa ve ta a, râng deuh neuh neuh te pawh a awm ve nual tawh, Gilmour hian 1972-1983 a studio recording an neih apiangin a hmang ziah a, hetih chhunga an live performance tam tak a hmang thin bawk.
He guitar hi pop culture thil hlui lakkhawm lama tui Jim Irsay-a’n 2019 khan Christie’s auction-ah tho hian dollar maktaduai 5-in a lei a, Irsay hi nikum khan boralin, a thil lakkhawm chi hrang hrang chu Christie’s hi an lilam tir ve leh a, dollar maktaduai 5-a kum sarih kaltaa a lei kha, dollar maktaduai 14.55-in an hralh leh ta a ni.
Irsay-a thil hlui lak khawm an lilamnaah hian Grateful Dead singer/guitarist boral tawh Jerry Garcia custom ‘Tiger’ guitar pawh an lilam zingah ian a, dollar maktaduai 11.56-in an hralh a, Kurt Cobain-a’n “Smells Like Teen Spirit’ music video-a a hman Mustang electric guitar pawh dollar maktaduai 6.9-in an hralh thei bawk.
Irsay-a collection lilam hi March ni 17 thleng an nei dawn a, lilam turah hian Paul McCartney-a’n a hming a ziah hnan Hofner bass guitar leh McCartney-a kutziak ‘Maxwell’s Silver Hammer’ lyrics te, Eddie Van Halen hming ziahna ‘Frankenstart’ guitar, Muhammad Ali boxing glove hlui bakah ZZ Top member Dusty Hill-a bass guitar beram vun a tuam te pawh a tel.