Airport-ah IAF kan dawr tawh lo – Chief minister

Lengpui Airport enkawl chungchangah Mizoram sawrkar chuan Indian Air Force a dawr tawh lo hrim hrim a, Airport Authority of India nen chauh an indawr tawh a, indawrna a fel tep tawh tih chief minister Lalduhoma chuan a sawi.
Assembly Session-ah chief minister chuan, airport enkawl zui chungchangah Congress sawrkar hunlai atangin an lo indawr tawh a, Indian Air Force (IAF) hian la chhawng turin ‘offer’ tha tak an nei a, Airport Authority of India (AAI) pawh an dawr tho a, a tu sawrkar pawh nise an beidawng tlang tih a sawi.
AAI hian an phurpui loa, sawrkar lehkha an chhang tha duh loa, an offer a chhe bawk a. IAF offer a tha si a, an lam hawi mai an rawt laiin, NGO Coordination Committee leh party dangten AAI hnena hlan an tih tlat avangin IAF hi an dawr zui tawh lo reng reng a, airport chungchangah an inkarah eng thu mah a awm tawh lo tih a sawi a ni.
Union Home minister-in AAI kuta hlan mai tha tiin, heti zawnga hma la zui turin thu a dah chu bawhzuiin, Civil Aviation minister hoin Home secretary leh AAI hotute telin an sawikhawm a, heta an thuthlukna ang hian thil a kal vek lo thung a, Home minister duh dan zawk zelin an kal ta tih a sawi bawk.
“Tuna Lengpui Airport building leh assets neih ang ang hi a hlutna chhut chhuakin, AAI-in state sawrkar hnenah a sumfaiin a pe dawn. Engzat nge a nih dawn la hre lo mah ila, an chhut ang chu pawm nghal mai kan tum bik lo. State sawrkarin airport-ah hian sum tam tak a seng tawh a, tlawm lutuka pek mai kan tum lo,” Lalduhoma hian a ti.
Chutihlaiin AAI hi an phur loa, Union Home minister an hlau a, an ti mai mai nia sawiin, tuna an airport neih sa pawh an enkawl seng loa, an outsource dawn tih an chiang sa tih chief minister hian a sawi a. An inremna tur point-ah Mizoram sawrkarin, AAI-in midang hnena an pechhawng dawn a nih chuan Mizoram sawrkar remtihna a ngai ang, tih an telh chu an pawm duh tlat lo tih a sawi.
“Kan final thei dawn hnai tawhah kan ngai a, an tih tihin an ti tawh mai a ni ang chu,” a ti.