AR leh ZPM sawrkar inremna hi agreement chhe ber an la ti ang – Lalruatkima

AR leh ZPM sawrkar inremna hi agreement chhe ber an la ti ang
– Lalruatkima
Aizawl atanga Assam Rifles an chhuah theihna tura Mizoram sawrkar nena an inremna chu thangtharten ‘inremna chhe ber’ an la tih a rin thu MNF hruaitu Lalruatkima chuan a sawi.
Thawhtannia Vanapa Hall kawta MNF party-in ‘thudik sawi tur leh dawt hmanga Mizoram hruai tawh lo tura chief minister Lalduhoma phutna punkhawm’ an huaihawtah MNF treasurer Lalruatkima chuan, Pu Laldenga hun lai atanga MNF-in hma a lo lak tawhna, Pu Zoramthanga sawrkarin theihtawpa a bawhzui zel leh tuna hlawhtling ta, ZPM sawrkarah a hlawhtlinna tak lo lang, Assam Rifles chhuahsan ram mipui tana tangkai tura cheibawl a ni dawn ta chu lawmawm a tih thu a sawi.
Chutihlaiin Aizawl mipui chanai AR-te duhsak taka tui supply tumah leh AR-ten lei man zawng zawng an awl bikna tura inremna siampuiah ZPM sawrkar puhin, “AR leh ZPM sawrkar inremna hi thangtharten agreement chhe ber an la rawn ti dawn a ni,” a ti.
Mizoram politics-a la thleng ngai lo, chief minister dawt sawi hrat lutuk vangin punkhawm a ngai tih MNF hruaitu hian a sawi a. State leiba leh budget dinhmun thlirin a lungawi thlak loh a, sum lengvak a tlem a, dawt erawh a leng nasa hle tih a sawi.
UNNATI chungchangah CM chu dawt sawiah a puh loh theih loh tih a sawi a. UNNATI leh SBI a hriatpawlh tlat a, Lengpui ram hralh sum kawngbo nen a hriatpawlh a nih a rin thu a sawi bawk.
“Inthlan kan hmachhawn tawhah rorel lai an che chhe zel a. AMC inthlan chungchangah a chhan sawi tur awm si loin inthlan an puang thei loa, an candidate tur pawh an la puang thei lo. Inthlan an cho lo tih a chiang hle,” Lalruatkima hian a ti.
Aizawl khawpui sawn a, Aizawla hmasawnna engmah thlen tum tawh loin hma an la tih a sawi a. MNF chuan AMC hmang leh a theih ang angin Zofate Jerusalem Aizawl chu cheihnum deuh deuh an tum tih a sawi a ni.
MNF Thalai vice president Lalnunmawia Pautu chuan, 2024 July khan CM leh a naute dawtsawi 100 an lo hal tawh a, CM dawtsawi tharlam tam tak an hal leh ta tih a sawi.
CM-in UNNATI loan cheng vbch. 15 la anga a insawi chu vbch. 5 chauh a la tih bank-ah an zawtfiah a. CM-in Assembly Session-ah Lengpui ram hralh chungchang chhui turin CBI hnenah an thlen a tih chu eng document mah CBI hnenah thehlutin an la pe lo tih an finfiah tawh bawk thu a sawi.
CM-in MNF Thalai president chu kal paha work order pe thin anga a puhna chu department-ah an fiah a, chutiang engmah a awm lo tih pawh sawiin, “CM hian a dawt sawi hi bansan rawh se, a bansan lo a nih chuan sawi tur tam tak kan la nei,” a ti.