Sinner a champion

On Mar 17, 2026 0 0

Thawhtan zing khan Indian Wellds final khelh a ni a, inkhel hmuhnawm takah Jannik Sinner chuan a khingpui Daniil Medvedev chu set hloh lovin a hneh a, a champion. Sinner hian Federer leh Djokovic te hnuhnung zuiin hard court-a inelna lian hrang hrangah a champion kim.
Final-ah World No. 2 leh top 10 huanga kir thar leh Daniil Medvedev te an inhnehtawk viau a, inkhel hmuhnawm tak an lantir. Set hnih an khelh chhungin break nei thei an awm lo ve ve a, tie-break khelh a ngai ve ve a, hun pawimawhah che fuh thin Jannik sinner a pawng hret a, set hloh lovin a chak.
Kum 24 mi Sinner hian kum 2026-a Carlos Alcaraz hneh thei awm chhun Daniil Medvedev hi ngam takin a hmachhawn. An intum hnuhnung vawi kuaa vawi riat zet a hneh tawh Medvedev lakah inringtawk takin a inlan. Set khatnaah game ruk ve ve an lak hnuin tie-break khelh a ni a, tie-break-ah pawh an intum tawk viau a, 8-6 a chungnung hramin Sinner-atn set a la.
Set hnihnaah pawh an inhnehtawk zui leh viau a, tie-break khelh a ngai zui leh. Tie-break-ah Sinner chu 7-4 in a chungnung zui leh ta mai, inelna neih meka khel tha tluang tak Daniil Medvedev lakah 7-6 (8-6), 7-6 (7-4) a hnehna changin Indian Wells-ah a vawi khat nan a champion a, hard-court-ah hnuhma ropui zawk a hnutchhiah.
Hard-court-a inelna lian zinga mi Indian Wells-ah a champion tak vangin Sinner hi hard-court-a inelna lian zual paruk; Australian Open, US Open, Miami, Toronto, Cincinnati, Shanghai, Paris leh ATP Finals-ah te a champion kim vek tawh a. Player ropui Roger Federer leh Novak Djokovic te hnung zuiin hard-court a inelna lian zual parukna champion kim vek thei a ni a. Hard-court a inelna lian zual paruka champion kim thei naupang ber a ni nghal bawk.
Jannik Sinner lakah tlawm a, champion zo ta lo Daniil Medvedev khan Middle East buaina vangin Indian Wells hi a hmachhawn lo teuh hle. A hmachhawn loh teuh tak inelnaah tel hramin harhtharna a chang aa, a chetha zui ta viau. Kum 2026-a la chak vek Carlos Alcaraz lakah set hloh lovin a chak hial a. Champion theih inbeisei viau mah se tunhnaia a ngam loh Sinner ngam lovin a tlawm leh ta nge nge a. Champion zo ta lo mah se Medvedev hi ATP Ranking chhuak tharah hma a sawn a, top 10 huangah a kir leh tawh.