NIELIT zirlaite apprenticeship sawipui

NIELIT zirlaite apprenticeship sawipui
Indian Institute of Entrepreneurship (IIE) Guwahati chuan Regional Directorate of Skill Development and Entrepreneurship (RDSDE) nen tangdunin hmarchhak bial chhunga apprenticeship ecosystem tih changtlungna atan Ministry of Skill Development & Entrepreneurship (MSDE) hnuaia a bika hmalakna ‘Workshop for Establishments on Apprenticeship Promotion’ chu Nilaini khan NIELIT Aizawl-ah a buatsaih a. NE Brothers Ent. Pvt. Ltd. Manipur buatsaihin NIELIT bakah Mizoram hmun 4 dangah neih a ni.
Workshop thil tum chu – apprenticeship training chungchanga hriatna leh establishment-te tana a hlawkna, apprenticeship rules siamthatna leh ruahmanna chungchang hriattirna, PM-NAPS hnuaia NER-a Special Intervention for Promotion of Apprenticeship chungchang mipui hriattir, stipend support Rs. 1500 bakah additional support Rs. 1500 PM-NAPS hnuaia pek leh apprenticeship portal hman dan inzirtir a ni.
Workshop hi NIELIT Aizawl director Dr T Gunendra Singh chuan hmanpuiin, zirlaiten an thiamna in a tlin phawt chuan private sector-ah eizawnna ni satliah lo, hlawh tam tak hmuh theihna a inhawng zau em em a, chutiang atana zirlaite tan apprenticeship tangkaina leh hmasawna awm theite a sawi a ni.
NIT Mizoram chhuak Lalhruaitluanga (B Tech) chuan workshop neih chhan leh a thil tum a sawizau a. NIELIT zirlaite leh zirtirtute bakah Aizawla inbun industry leh establishment sawmbikte an tel.