Hlawk zawka grape an thar theih dan tur ngaihtuah sak

Hlawk zawka grape an thar theih dan tur ngaihtuah sak
KVK Khawzawl leh ICAR-NRC Grapes Pune tangdun chuan Nilaini khan Hnahlan khuaa grape chingtute an hmunhmaa kalin an hriat tur tul an zirtir.
KVK Khawzawl senior scientist Dr Malsawmkimi chuan, khawvel thang zelah kuthnathawktuten hma kan sawn a tul a, tun aia hlawk zawka grape thar thei turin tunlai technology hman thiam a pawimawh tih a sawi a ni.
KVK Khawzawl subject matter specialist (Plant Protection) Dr Lalngaihawmi chuan rannung eichhetu laka grape ven dan, natna hrik laka venna leh an grape than duhna vitamin pek dan a zirtir a. Hnahlana grape chingtute grape chawr rual lo chu an harsatna a nih tel avangin a chawr rual theih dan tur KVK mithiamte hian an zirtir bawk.
Grape enkawlna atan leitha, rannung thahna hlo leh natna enkawlna tur bakah vitamin an pe nghal a ni.
KVK Khawzawl hian TSP (Tribal Sub Plan) hnuaiah Hnahlan leh Chawngtlai khuaa grape chingtute hnenah tun aia hlawk zawka an tharchhuah theihnan theihtawp an chhuahpui mek a ni.