GST tlakhniam chhan thil pathum

Mizoram sum hnar pawimawh, GST atanga sum hmuh a tlahniam a, nikum lamah pawh a tlahniam tawh. Hemi chungchang hi Mizoram politics-ah titi pakhat a tling a, social media lamah pawh GST atanga sum hmuh zat leh a tlakhniam thu te a lang thin.
Chief minister Lalduhoma, finance changtuin GST tlahniam chhan thil pathum a sawi a, Hachhek bialtu Robert Romawia Royte zawhna, ziaka chhan chi chhangin Budget Session liam taah khan a sawi a ni.
GST tlakhniam chhan a sawi hmasak ber chu Mizorama hna liante a thawktute’n an thawk zo a, an chhiah pek thin kha an tlak tawh tih a ni.
“Central funded works lian tham tak tak atanga GST lut hi hun engemaw ti chhung kha chuan Mizoram state tana GST contribute-tu lian tham an ni thin a. Heng hna lian tak tak thawktute’n an hnate an zo a, an chhiah pek thin a rawn lut ta rih lo a ni,” tiin House a hrilh.
GST tlakhniam chhan a sawi pakhat dang chu kawng chhiat vanga harsatna a ni.
“Hun rei tak chhung kan bungraw lakna ber kawngpui a tha lo a, chhiah lakna bung rua rawn luh mumal theih loh avangin,” tiin hemi chungchang hi a sawi.
A chhan dang a sawi pakhat chu dan lova bungrua a rawn luh vang tih a ni a, dan lovin bungrua thahnem tak a rawn lut a, GST an pek loh avangin a man a tlawm zawk zel bawk a, chu chuan GST pe thinte inhralh a nghawng tiin a sawi a, chu chu GST tlakhniam chhan a tih a ni.
“Dan ang taka chhiah lakna bungrua ang chi-ah, dan lova lo lut hi thahnem tak a awm a, GST a tel loh avangin a man a hniam zawk zel bawk si a. Hei hian dan ang taka GST belh tela bungraw zuartute sales volume hi engemaw chen a tihniam a. Chu chuan sorkara GST lut hi nasa takin a tihniam a ni,” a ti.