Silchar-ah Chapchar Kut
Silchar-ah Chapchar Kut
Inrinni khan Mizoram House, Silchar-ah Chapchar Kut an hmang a, kût thupui atan ‘Zonun ze mawi – Inremna’ tih hman a ni.
Joint MSU, Silchar te’n Khuallam hmangin bul an tan a, Lalbiaknunga’n hlado a chham a. Rev. R. Lalfakawma’n hunserh a hman hnuah, Kût Thlengtu Lalhmingliana, DRC, Silchar-in inlawmna thu a sawi.
He huna ‘Kut Pa’ tura sawm, Central YMA president R Lalngheta’n thu a sawi a, kût hman chhan leh kumin thupui ‘Inremna’ pawimawhzia a sawi a. Mizote hi khawiah pawh awm ila, kan hnam nunphung leh mizia—tlawmngaihna leh inlungrualna te hi kan vawn nun tlat a pawimawh, a ti.
Kût hi hlawhtling taka hman a nih theih nan Serlui Group YMA, Zampuimanga Group YMA, leh Barak Valley-a YMA Branch 25 zet bakah Hmar Students Association, Hmar Welfare Association, Ranglong Students Organisation, Kuki Students Organisation leh Kuki Worship Service ten an hmanpui a ni.
He kutah hian hnam lam chi hrang hrang entir a ni a. Central YMA Cultural Performing Troupe te, Ranglong Students’ Union leh Joint MSU Headquarters, Silchar-ten hnam lam mawi tak tak an entir a. Lalbiakhluni Colney, Bartimon Hrangkhol leh zaithiam hrang hrangte zai in kalkhawm mipui te an awi a ni.
He hunah hian Jayshree Khersa, IPS, DIG (Southern Range) bakah Central YMA Finance Secretary MS Ralte leh CEC member-te, leh Pu Thomas D. Lalengliana, President, Sub-Hqrs YMA, Kolasib hruaitute pawhin thu an sawi.
Chapchar Kut 2026 lawmnaah hian kalkhawm mipuite atangin Zopa, Zonu, Valtinkhuma, Lengtinkhumi, Bungdawntuaia leh Bungdawntuaii te thlan a ni a, naupang lam atangin Bungdawntuaia leh Bungdawntuaii te thlan a ni bawk. Silchar khawchhung atanga tlawmngai taka thisen pe tam pathum K Vanlalhriata, Lalbiaknunga leh K Lalrinnungi te hnenah chawimawina hlan a ni bawk.
Kut hun tawp lamah ‘Chhawng Hnawh’-a hun hman a ni a, Central YMA Cultural Performing Troupe-ten Chai leh Chheihlam hmuhnawm takin an entir bawk. Hasina Begum, ARC, Mizoram House Silchar-in lawmthu sawina hun a hman zawhah Pro Pastor C Vanlalpeka’n tawngtaiin kût hi a khar a ni. Kut ruai tui tak kilho nghal a ni.