BTS album thar ‘ARIRANG’-in Spotify record siam

BTS album thar ‘ARIRANG’-in Spotify record siam
Korean supergroup BTS album thar ‘ARIRANG’ chu March ni 20 khan an tlangzarh ta a, kum ruk vel zet hnua an album tlangzarh leh hmasak ber a ni bawk a thawm pawh a lian nghal hle a, Spotify record pawh a siam nghal nual e.
Spotify chuan ‘ARIRANG’ hi 2026-a album ni khat thil thua an platform a stream nasat ber a la nih thu an puang a, Spotify history-ah K-pop album ni khat thil thu a stream nasat ber a la ni bawk. Spotify chuan he album hi an tlangzarh hma pawhin an platform-a Countdown Page-a album pre-saved nasat ber a ni tih an puang bawk a, pre-save maktaduai 5 chuang a tling thei a ni.
ARIRANG album hi hla 14 awmna niin, Diplo, Kevin Parker, Mike WiLL Made-It leh Ryan Tedder te produce a ni a, RM, Jin, Suga, j-hope, Jimin, V leh Jung Kook te an kum mai bakah a aw leh lyrics te pawh a lo puitling lehzual ta a, artistically pawhin an lo inthlifim lehzual tawh tih he album thar atang hian a hriat theih a ni.
BTS full-length album hnuhnung ber chu 2020-a an tlangzarh ‘Be’ kha niin, Billboard 200 (US albums) chart No.1-ah a debut a, he album-a an hla ‘Life Goes On’ pawh Billboard Hot 100 (US singles) chart-ah a No.1 thei bawk. BTS hian khawvel an awp hneh vanglai takin an group member te South Korea sipai-a an inziah luh a ngaih avangin chawlh an la ta a, tunah an sipai tan hun te zoin, rimawi khawvelah an rawn comeback leh ta a ni.