Pensioner-ten MUHCS an zawm tam lo inenkawlna senso hmang tam fal thung: – Finance secretary
Mizoram Universal Health Care Scheme (MUHCS) ah pensioner inziaklut an tam loh avangin contribution-ah a lut tam loa, hetihlai hian damlo inenkawlna senso ah an hman tam fal avangin an kawppuite chauh tih kep theih tawh tura duan a ni ta tih Finance secretary Ramchuana chuan a sawi. Sawrkar kum thar atana MUHCS 2.0 kalpui turah pensioner-te hamthatna dawn theih dan tih danglam a nih chhan Finance secretary hian a sawi a. MUHCS 1.0 ah khan mipui nawlpui huam theihna turin pensioner-te pawh Central Govt. Health Care Scheme (CGHCS) hnuaia pensioner an kalpui dan ang deuhin, Fixed Medical Allowances (FMA) an dawn theih chu an ‘surrender’ a ngaih bakah sawrkar hna an thawh laia an level puite thawh zat an thawh ve a ngai a, an sum lakluha innghat an chenpui (ration card-a chuang) a huam a. Mizoram sawrkar hnuaia pensioner-te hian FMA hi an surrender duh lo tih a sawi a ni.
Hemi hnua an indawr zui lehnaah MUHCS 1.0 ah khan duhsak taka scheme siamsakin, an duhthua zawm turin ruahman a ni a. an association hruaitute nen sawiho a nih hnu ah, an duhdan zulzuiin category A chuan thla tin Rs.1000 thawhin kum khatah cheng nuai 12 thleng inenkawlna an dawng thei a, private cabin-ah an awm thei bawk. Category B-in thla tin Rs.500 an thawh ve thung anga, cheng nuai 5 thleng inenkawlna tum sak theih niin, semi private ward pek theih an ni a, damlo zin veivahna pek sak theih a ni ve ve tih a sawi.
An tana scheme siamsak hi zawm tha viau tura beisei a nih laiin, pensioner 37000 vel zingah 10400 vel chauhin an zawm a, a zawmtu hi hmun thuma thena hmun khat pawh an tling pha loa, contribution hi 2026 February thleng khan cheng vaibelchhe 9.33 a nih laiin, an scheme-in a huam (family member nen vek) a inenkawlna atana an hman chu cheng vaibelchhe 27.35 a ni thung tih a sawi a ni.
Sawrkar laipui hnuaia pensioner-te health care scheme – CGHCS pawh an zirchiang a. Hetah hian pensioner-te sum lakluha innghat an chenpuite huamtir ni mah se, CGHCS hi an zawm dawn chuan FMA surrender a ngai a. Chumi hnu ah an pension chhuahna pay level atanga chhutin contribution an pe leh nghe nghe tih Ramchhuana hian sawiin, chu pawh thla 12 contribution chu tum khatah pek tlak tir nghal an ni a. Mizoram sawrakr hnuaia pensioner-te erawh tum khata pek tlak kher ngai loa ruahman a ni tih a sawi.
“Pensioner category bik dinhmun enin leh a pumpui thua enrolment enin, he category hnuaia enrolment hian beisei a phak lo hle a, ruahmanna tha tak siamsak an ni chunga zawmtu an tlem dan ngaihtuahin leh CGHCS-a pensioner an kalpui dan enin, MUHCS 2.0 ah chuan general contributory beneficiary dinhmun atanga lak hran hlawk tha in Governing Body chuan a hria a. FMA erawh surrender kher loin an FMA lak ang zat kha subscription fee-ah an hmang anga, chu bak thla tin thawh belh ngai tawh lo tura tih a ni,” a ti.
MUHCS 1.0-ah pensioner-te an chhungkua, ration card-a awm zawng zawng an huamtir laiin, sawrkar hnathawk mekte zawk pawh chhungkaw member zawng zawng huamtir an ni loa, FMGE&W chuan hei hi a ngen ve nghe nghe a, sawrkarin a remtih tak loh hnu ah an dependent – an fate kum 25 chin bak phalsak loh chu a aia rei an ngen leh a, hei pawh hi phalsak an ni ta chuang loa, hetihlaia pensioner-te an chhungkaw member zawng zawng huamtir vek kha MUHCS 2.0 ah chuan tihtawp a ni ta, an kawppui (nupui/ pasal) chauh kep theiha tih a ni ve ta mai zawk ani tih Finance secretary hian a sawi a ni.
An thil kalpui tum dan chu pensioner-ten an duh lo a nih chuan, an puala scheme siam kher loin, general contributory beneficiary anga an zawm ve mai dawn ruahman a har lo tih a sawi a. Chutihrualin, FMA la bawk MUHCS hlawkna dawn bawk, ‘dual benefits’ neih chu a remin a lang lo tih a sawi a ni.
Category wise payment
Category Amount % Count % Claim size claim % per no. of enrolment
AB-PMJAY 57,61,48,727 36% 67340 65% 8566 30%
Contributory 35,59,47,220 22% 16556 16% 21500 82%
Govt employees 41,01,46,134 25% 12462 12% 32912 35%
Pensioners 27,35,03,624 17% 7885 8% 34687 77%
Total 1,61,57,45,705 100% 104243 100% 15500 36%
Contribution upto February 2026:
Govt employee 20,29,15,100
Pensioner 9,33,17,310
Prov. employee 1,07,00359
Total 30,69,32,769