Ruihhlo vanga nunna chan 2000 tling tawh

Mizoramah ruihhlovin harsatna a thlen a, vanduaithlak takin mi 2000 chuangin ruihhlo vangin nunna an chan tawh.
Mizoram Excise & Narcotics (MEN) department-in 1984-ah ruihhlo vanga nunna chan zat an chhinchhiah tan a, 2026 March ni 18 thlenga an chhinchhiah zat chu 2016 a ni.
An chhinchhiah danin, 1984 hnua ruihhlo vanga nunna chante hi mipa 1770 leh hmeichhia 246 an ni.
A tam ber chu spasmo proxyvon/parvon spas vanga nunna chan an ni a, mi 1161 an ni. Hetiang damdawi hi a chhuak tawh lo a, MEN department chhinchhiahna enin, 2017 atangin spasmo proxyvon/parvon spas vanga nunna chan an awm tawh lo.
Heroin vanga nunna chan zat chu 312 a ni a, mi dang 543 chu ruihhlo chi hrang hrang khawih pawlh niin, heroin leh spasmo proxyvon/parvon spas pawh a tel fur.
Kum 31 leh thla hnih leh a chanve chhunga ruihhlo vanga nunna chante hi kum 14 leh 58 inkar an ni.
Kum liam ta 2025-ah khan ruihhlo vangin mi 118-in nunna an chan a, mipa 100 leh hmeichhia 18 an ni. 2004-ah khan mi 143-in ruihhlo vangin nunna an chan a, chumi hnuah 2025 kha ruihhlo vanga nunna chan an tam ber kum a ni.
An chhinchhiah tan kum 1984-ah nunna chan zat hi pakhat a ni a, 1992-ah 12 niin, hei hi 10 a tlin vawi khatna a ni. 2000-ah 139-in nunna an chan a, hei hi 100 a tlin vawi khatna a ni. 2005-ah mi 42-in nunna an chan a, hemi hnu hian a tlahniam leh. 2005 atanga 2024 thlengin 100 a tling lo a, 2025-ah a tling leh.