Leithum Haw Runpui hmang

Leithum Haw Runpui hmang
Champhai district Leithum khua chuan Nilaini khan ‘Haw Runpui’ an hmang a. Art & Culture minister C Lalsawivunga leh East Tuipui bialtu MLA Ramthanmawia ten an hmanpui.
Minister chuan Leithum khua chuan sakhuanaah, zirnaah, sawrkar leh ram rorelna thlengin mi chhuanawm tak tak a hring chhuak tawh tih a sawi a. An khaw mi leh sate chu awmna hmun theuhah intodelh duhna thinlung pu a, an eizawnna kawng theuhah hma sawna rahbi rap a, intodelh khua ni a, khaw dangte entawn turin rinawmna nen hma la turin a chah.
East Tupui bialtu MLA pawhin, khawtlang hmasawnna tura zirna kawnga tan lak a tul zia, ramngaw leh tuihna humhalh tul zia, ruihhlo in kan ram leh hnam a tih chhiat nasat zia leh khawtlang tangruala do a tul tawh zia a sawi a ni.
Leithum khua hi khaw hlun tak niin, Hualngo lal Hualzasela (Pa Huala) leh a thuihhruaiten kum 1896 khan an luah tan a, kum 1996 khan centenary lawmin tunah hian kum 130-na an hmang mek.
Haw Runpuiah hian Leithum khua tihmingthatute chawmimawi hlan an ni.