Ram hruaituten an theihtawp an chhuah vek – Lalruatkima

Ram hruaituten an theihtawp
an chhuah vek – Lalruatkima
Ram hruaitu kan neih tawh zawng zawngten ram tan an theihtawp an chhuah vek tih MNF minister Lalruatkima chuan a sawi.
Zirtawpnia Mizo Hnam Run inkhawmah MNF adviser ni bawk Lalruatkima chuan kan ram chhe ta vek anga sawituten lalna leh thuneih an chak luat vanga sawi thin an ni a, a chhe vek lo tih a sawi. “Ram hruaitu kan neih tawh zawng zawng – Pu Ch. Chhunga, Brig.Thenphunga Sailo, Pu Lal Thanhawla leh Pu Zoramthanga te hian ram tan theihtawp chhuahin an bei vek a. Mah se, tunhmaa lian, zau leh tha kan tihte kha ram thangzel leh changkang zelah a lo tawk lo mai a ni. Insawisel ringawt hian ram a siamtha dawn lo,” a ti.
Assam Rifles sawnchhuah tum chu party thenkhatin an lawm hauh loa, a chhan chu mipui an lawm si a, chu chu an hlawkpui loh an hlauh vang niin a sawi. 2018 inthlan dawna MNF manifesto no.11-ah ‘Aizawl atangin sipai sawn chhuah a ni ang’ tih a nih angin, an manifesto hi an dinpui a, an tihlawhtling zel tih a sawi. Pu Zoramthanga sawrkar chuan sipai chhuahsan tur ram hi mimal hnenah pek a tum lo hrim hrim tih Land Revenue minister Lalruatkima hian a sawi bawk.
Sipai sawnchhuah chungchangah Congress party leh MNF duhdan a inang lo nia sawiin, kum 2005 khan mipui kutah AR ram hlan a nih lohna’n MPCC chuan resolution a pass tih a sawi a. 1995 August 7 khan Congress president hlui, khatih laia chief minister chuan India ramah khawpui laili atanga sipai sawnchhuak a la hriat loh avangin a huphurh thu a lo sawi tawh bawk tih a sawi. MNF chuan mipui kutah AR ram chhuahsan hi hlan an tum thung tih a sawi a ni.
Ram hmangaihtu nia insawiin ZPM chu an ‘aggressive’ em em niin MNF adviser hian a sawi a. “Lalna leh thuneihna chiah duhin an che buan buan mai a ni. Kum 1997-a nationalism kengtu nia insawia chhuak ta zawng zawngte kha an kal zel a, tunah chuan nationalism hlamchhiahin Zoram People’s Movement-ah an inchhungkhawm ta vek a. Nationalism kalpuitu nia insawiten ‘Chhura aium thlauh’ angin nationalism an thlauh bo ta. MNF aia nationalism kengtu dik he ramah an awm lo,” a ti.